يا (بو راشد) يطول اللَّيْل والصِّبْح بَابْ

وانْت شِعْرِكْ صباح البارحه بابها

يا (بو راشد) علوم الشِّعر ما هي غِيَابْ

أنْت تدري علوم الشِّعر وِشْ صابها

يا (بو راشد) سَرَى بِالْوَرْد عِنْدِكْ كِتَابْ

من كتاب الليالي الْبِيْض وِعْتَابها

يا (بو راشد) معاني الوِدّ رَوْض وْرِضَابْ

والعيون الْمِحِبِّهْ شُوْف ماذا بْهَا؟

في سِمَاهَا عيون النَّاسْ مِثْل السَّرَابْ

ما يبِلِّهْ سوَى يَمْنَاك وِعْذابها

في شفاه الْبَرايَا شوْف باقي خطاب

من مراره يشِيْب اللَّيْل من صابها

كَم ذِكَرْنَاكْ يا سِيْدي وْزَلّ العذاب

وْ كَم ذِكَرْنَاكْ والْفَرْحه سَهَرْنَا بها

كَم لمَحْنَاكْ وِهْموم الليالي ركاب

وانْفَرَجْ هَمّ من شَوْفَتْك فِزْنَا بها

يا (بو راشد) وْكَم مَرَّيْت بِكْ في الزَّهَابْ

يوم أنا ناوي الْفَرْقَى وْطَلاَّبها

قِمْت أهَوْجِسْ وَاشُوْفِكْ دون قوسين قاب

في ضلوعي أجِرّ القوس واعْنَى بها

وَاتغَنَّى أنا بِـ(دْبَيّ) رُوْح وْرِحَابْ

غَابْ عَنْها الشِّقا يوم انْت في بابها

شِفْت أنَا الدار يا شَيْخي يدَيْها خِضَابْ

لين صَارَتْ عروس الأرْض بِخْضَابها

دارنا بِكْ يا (بو راشد) سهول وْهِضَابْ

صار تزهو ويزهو السِّحْر بِهْضَابها

وَاشْهَدْ الدَّارْ من هِمَّتْك صَارَتْ سِحَابْ

وَاشْهَدْ السِّحْب من هِمَّتْك تِهْنَا بها

بَسّ أبَاقول يا شَيْخ المعاني الْعِذَاب

يا (محمَّد) يا بو الطولات وِشْهَابها

ْ

لِكْ علينا نصون الدَّارْ يوم الْحِرَابْ

الله لا جاب طاري الْحَرْب وِحْرَابها

أشْهَدْ أنّ الليالي السُّوْد لو هِيْ غراب

من دجاها يبِيْن الْهِرّ وِذْيَابها

بيْس رَجْل ٍ إذا كَشَّرْ عَنْ الْحَرْب نَابْ

مَا يْبِيْع نَفْسِهْ لاجل داره وْبَاسْبَابها

تالي القول يا (بو دْبَيّ) مَا لِلتِّرَابْ

غَيْر شَعْب ٍ يسوم الرُّوْح لِتْرَابها