الإحساس المزدوج

عيني عليك وْخاطري عِنْد غيرك

تبغي الصراحه غَصْب عنّي أجامِلْك..!

لانّه مصيري مِرْتِبِطْ في مصيرك

هذا السبب أجْبِرْ شعوري يغازِلْك

لا طاح طيري أنْت ما طاح طَيْرك

عِنْدك حصانه صَعْب يِمْكِن تجاهِلْك

ولا ضِقْت من هَالوَقْت يفْزَعْ وزيرك

أبوك لى بالواسطه دوم شَامِلْك

ملَكْت دنيا الوَهْم لى تَسْتِعِيْرِكْ

للآخره في يوم من مَعْك هامِلْك

وانا قنَعْت وْكَثَّرْ الله خَيْرك

يبقى ضميري حَيّ وآنا أعامِلْك

وانته بتلقى مَنْ غرامه يِجِيْرِك

اللى على مُوْدِكْ أموره تبادِلْك

يمكن إبن عَمِّكْ.. سفيرك.. أميرك

اللي برِسْتِيْجه وطَبْعِه يقابِلْك

ما هو عجَبْ لو انّي أرفِضْ هجيرك

بَسّ العَجَبْ يا كيف تبغي أغافِلْك

تبغي الصَّراحَه خاطري عِنْد غَيْرِك

عيني عليه وْغَصْب عَنِّيْ أجامِلْك!!

ْ