طفلة النور

صحيح عِمْرِيْ في الشهاده ثَلاثِيْن

لكنْ معاك آحِسّ به عَشْر وِشْوَي!

تَمْلي حياتي بالْفَرَحْ والتلاوين

واقْضِيْ معاك الْوَقْت بالإنْس والغَي

أكْبَرْ بحِبّك وِصْغِرَتْ فِيْني سْنِيْن

ما عِدْت أحِسّ العمر ويَّاكْ يَمْشي

أحِسّ كَنّي وِسْط روضة بساتين

طِفْله يغازِلْ ضِحْكها النُّوْر والضَّي

يا اللى سكَنْت القَلْب والرُّوْح والْعَيْن

إنْتِهْ لطفلة قلبك الزاد والمَيّ

يا زِيْن عِمْري وانْت ويَّايْ يا زَيْن

إن غِبْت عَنِّيْ يَوْم ما احَسِّنِيْ حَي

أرْجوك لا يطري على بالك الْبَيْن

لا رِحْت عَنِّيْ خايفه يْصِيْبني شَي

وانْ غِبْت عَنّي أرْبَع أيَّامْ في (العَيْن)

تنْتاب قَلْبي حَرَّةْ النار والْكَي

تَعَالْ واطْفي الشوق لى فيني الحين

بسْتان قلبي ينْتِظِرْ مِنِّكْ الرَّي

عساه رَبّي يحْفَظِكْ قول: آمين

وْتِبْقَى لعِمْري راحة النور والفَيّ