يا مرحبا واهلا وسهلا ويا حَيّ

باللّى بَعَدْ طول البطا ناض نَوّه

قَفَّيْت لا تَنْشِدْ ولا تدري بْشَيّ

وابْطَيْت والهاجوس لِكْ شَبّ ضَوّه

تَعَاْل.. واقْلِطْ بين ضِلْعَيْنِيْ شْوَي

ضَجّ الخفوق اللّى بطى ما تفوّه

ّ

حسيبك الله ما بقَى م ِ العَرَبْ حَيّ

إلاّ وصَرَّحْ لِكْ وْلَمَّحْ وْنَوَّه

عَنْ خاطر ٍ من غَيْبِتِكْ مِنْكوي كَيّ

ما عاد له حَوْل ٍ وْلا فِيْه قُوّه

نشَّفْت رِيْقي وانْت لِعْروقي المَيّ

وما هيب لا نخوَه وْلا هي مرُوّه

شِفْ كيف ضِيْق البارحه خالَف الغَيّ

وْشِفْ كيف صارَتْ بيني وْيَاكْ هُوّه

طَبْع الليالي شَيْن لا عانَدْ الضَّيّ

والحِزْن تَوّهْ يصهر الكَبْد تَوّه

جِيْتِكْ بْشَيّ وْلازِمْ آعَوِّدْ بْشَيّ

من قَبْل لا تْعَكِّر مزاجي وْجَوّه

لا قِلْت لك يا هلا.. مرحبا.. أيّ:

قَصِّرْ مدَى حَبْل المفَارَقْ وطَوّه

(فَزَّاع) ما يَصْبِرْ بَلا خُوَّةْ (دْبَيّ)

أمَّا كذا.. والاَّ بَلاشْ المخُوّه!