أكِّدْ عَلَى اوْرَاقْ الذَّهَابْ وْقَطِّعْ أوْرَاقْ الإيَاب
غِيَابي أفْضَلْ من وجودي والسعاده غايبه
بَارْحَلْ عَنْ (آلامي) وَادَوِّرْ لي على دِيْرَةْ غِيَابْ!
واشوارك اللى جِبْتها من عام ما هي صايبه
يا اللى تحَرِّضْنِيْ على المِقْعَادْ خَالَفْك الصواب
ما فِيْه داعي للعتَبْ والنَّفْس قِدْها طايبه
ما عادني مِتْحَمِّلٍ مِنِّكْ وَلا كِلْمَةْ عِتَابْ
ما ادْرِيْ وِشْ اسمه!! بَسّ دَقَّيْت بِيْبَانْ الأمَلْ.. وْلا انْفِتَحْ لي غَيْر باب!
أظِنْ باب الحظوظ الخايبه
أحْتاج شَمْع ..أحْتَاج شِعْر.. أحْتَاجْ أشُوْف إنْسَانْ غَابْ
ويا للأسَفْ في غَيْبته صارت حياتي سايبه
الشَّمْع ذَابْ.. الشِّعْر ذاب.. الشَّوْف ذاب.. العمر ذاب
وأشيائه اللى وِسْط صَدْرِي كِلّ ابوها ذايبه
أجْهَدْت نَفْسي بالهقاوي في متاهات وْسَرَابْ
يا ضَيْعَةْ اللى ما عَرَفْ دِنْياه وِشْ هِيْ جايبه!!
الحِبّ.. شَايِبْ مات!! وِسْنينه قضاها في عَذَابْ
والقَلْب عاف الدِّيْره اللى مات فيها شايبه!!
إخْتِمْ جواز البِعْد والرِّحْلِهْ ذَهَابْ بْلا إيَاب
... لا تَحْزِنِكْ عَيْنٍ مِنْ دْموع المواجَهْ رايبه
مو بَس أنا اللى شايل هْمومه وْمِغْرِيْه الغِيَاب
حتى المطار آحِسّ فيه أشْيَا كثيره غايبه!!