الصَّمْت مُوْقَدْ.. والتخاطِبْ دخاخين
والوَضْع مِحْرِجْ.. والصَّبِرْ عِنْق مَخْنوق!!
كِنَّا نصِبّ الماي مِنْ فَوْق في الطِّيْن.
وْصِرْنا نصِبّ الطِّيْن في الماي مِنْ فَوْق!
مَهْمَا نكابِر لاجل نبقى معافين
اللى يشوف الْعَوْق بَيْحِسّ بِالْعَوْق
آلامنا عالَم ويحْمِلْ مضامين
مغلّفه وِغْلافها يَدْهِشْ الذَّوْق
وآمالنا ما عاد تلْبَس فساتين!!
وْجِلْباب حاضِرْنَا غدى نِصْفِهْ فْتُوْق
نسْتَقْبِلْ الأفراح في حَفْل تأبين!
ونرثي بَعَضْنا كِلْ ما وِلْد مَخْلوق!
فوضى مشاعرنا تجسِّد عناوين
أنّ الفَرَحْ والحِزْن تَرْبِطْهِنْ عْرُوْق
نقول باكِر كِلّ الاحْوال بَتْزِيْن
يا هو تفاؤل يحْبِسْ الدَّمْع في الْمُوْق!!
نَطْرِدْ سَرَابْ وْ ما لَحَقْناه لَلْحِيْن
يا من تقول أنْ كِلّ مَطْرود مَلْحُوْق!!
لا تْعِيْدها ما عاد في الناس حَيِّيْن
لو يَنْسِرِقْ مبْداك بَيْتِمّ مَسْروق
وِشْ نلْحَق إن صار الْمَشِيْ في اتِّجَاهَيْن
واذا تخاوينا نمَت بيننا فْرُوْق!
لو شِفْت وِحْدَتْنا في صَفّ المصَلِّيْن
عِقْب الصلاه بْيَغْدِيْ الصَّفّ مَشْقُوْق!
عادي تشَال حْقوق من مِسْتِحِقِّيْن.
وِيْنالها واحِدْ مَاْ يِسْتاهَلْ حْقُوْق
طَيْر السلام اللى بلَيَّا جناحين
أحْسَنْ له يْعِيْش الْعِمِرْ وِسْط صَنْدُوْق
باعوا أمانينا (بِتَوْع الملايين)!
مقابِلْ تْراب وْحدايد وْطَابوق!!
واغْصَانْ (زيتون التسامِحْ) كَرَاتين!
مكَوِّدِهْ داخِلْ مخازِنْ هَلْ السُّوْق
قِمْنا نبِثّ الْبَيْن.. ما بيننا الْبَيْن
لين استوينا (عِلْك) في زَحْمَةْ حْلُوْق
يا كِثْر ما نشْهَدْ معَانَقْ ثَعَابِيْن..!
يرْسِمْ حسَب تَشْكِيْلِتِهْ.. عِنْق مَخْنُوْق..!