لعبة شِطْرَنج

لعبة (الشِّطْرَنْج) أفْهَمْهَا كِثِيرْ

وادري انّه يبقى في الآخر (مَلِكْ)

ويمْكِنْ (الجِنْدي) بَعَدْ ياكِلْ (وزير)

لِعْبِة ٍ من لا يسَايِسْها هَلَكْ

واعْرِفْ أنّ (الخَيْل) في الهيجا تِغِيْر

تقْتِحِمْ (اْلِقْلاع) في لَيْل ٍ حَلَكْ

لِعْبِة ٍ وِيْجِيْدها حَتَّى الصغير

وانْ سَألته لْفَنّها وِشْ وَصَّلِكْ؟

قال في ذا الوَقْت كِلْ شَي ٍ يصير

مثل ما (الراعي) صبَحْ (عَالِمْ فَلَكْ)

وْكَمّ غيري صار في اللِّعْبه خبير

وانْت خابر زين ما شَيْ يجهلك

إن تغِضّ الطَّرْف عَدَّوْك الضرير

وان تقول الصَّحْ قالوا ما اخْبَلِكْ!!

ما يطير الطير وِجْناحه كسير

يَامَا حَذَّرْتِكْ ويَاما قِلْت لِكْ

الذي حَظّه مِثِلْ حَظّ الفقير

ما ينال مْن السمَكْ غَيْر الْحَسَكْ!