الحظ الفقير

لو يشتكي قلبي عن اللى يشيله

كان اشْتِكَتْ اْلِبْحور ثِقْل المَحَامِلْ

الْوَقْت جايِر والأماني قتيله

بين الفراق وْجَرْح في القلب دَامِلْ

إلى متى وانا على كل حِيْله

أطْرِقْ عَلَى البِيْبَانْ واضْحَكْ واجامِلْ!

أشوف غايه ما تبَرِّرْ وسيله

دام السبب من باب سوء التَّعَامِلْ

أعْطتني كْفوف الزمان البخيله

حَظ ٍ فقير وْحِلْم ما هو بكامِلْ

وين الرحيل اللي يكَفِّيْ رحيله؟

عَنْ السؤال اللى يبى حَلّ شامِلْ

أبْغي أعيش أجواءْ غَيْبه طويله

كُوْد الغياب إن طال يخْلِقْ عَوَامِلْ

وابغي صَبِرْ لا زاد حِمْلي يشيله

يعني عَزِمْ واصْرار قاسي وصَامِل

عسى تجي غايه تبَرِّرْ وسيله

واعِيْشها من باب حِسْن التَّعَامِل!!