مَا هِيِّهْ؟؟؟

لى صِفَا لِكْ خِلِّكْ وْصَافَى

يا الصفي صافي له النِّيِّهْ

والْتِزِمْ بالْعَهْد واحْلافا

واليمين اللَّى بِهْ تْحِيِّهْ

تَمْلكه وِتْعيش مُوْلافا

نافِل ٍ عَن شَرّ مِسْعِيِّهْ

بو عيون ٍ تسبي آلافا

مِن سِحِرْهِنْ قَلْبي بْلَيِّهْ

حِلْو مَنْطُوْق وعسَلْ دافا

لى تِحَدَّثْ كِنْت مِصْغِيِّهْ

قَارِي ٍ مِنْ لَهْجَةْ الكافا

ما تلَعْثَمْ قَطّ مُوْلِيِّهْ

صايِغ ٍ لِلْحَرْف مِنْسَافا

مثل نَظْم الشِّعر من ليّه

عقْد لولو وْ يَكّ مِصْفَافَا

لَى نِطَقْ تِنْبَانْ مِنْ فِيِّهْ

عِقْب ذَاكْ وْذَاكْ من شافا

ما يلام (سْعِيْد) من ديِّهْ

من وضَعْت الْكَفّ مِلْحَافا

والْتِمَسْ لِخْدُوْدِهْ شْوَيِّهْ

صَاحْ كَفِّي بَسِّكْ وْكافا..!

ما تحَمَّلْ ملْمَسْ شْفِيِّهْ

حِسْنها بَلْقِيْس وِمْنافا

يَوْم تَرْنُوْ بْعَيْن مسْخيِّهْ

والجنود تْحُوْدها كْفَافا

حامِلِيْن الْعَرْش نَجْدِيِّهْ

هْجِمَتْ والجِنْد هِتَّافا

واسْتِبَاحَتْ أرْضِيْ وْفَيِّهْ

وِمْلِكَتْ عَرْشي وْمِكْنافا

واستقام المِلْك ذَا بِيِّهْ

ثم مَرّ الْوَقْت بَاطْيَافَا

واسْتكان الأمْر بِيْدَيِّهْ

وْحِزْتها بْصَبْر ٍ مَعْ ألْطَافا

بالقناعه عَرْشها لِيِّهْ

وفي تلاة القول مِحْرافا

يَا ذِهِيْن وْ هَيِّدْ شْوَيِّهْ

لا تظِنّ بْقَوْلي اردافا

الغزَلْ والعِشق هُبْ لِيِّهْ

بَل عِنَيْت بْشِعْري اخْلافا

بين سَطْر وْسَطْر مِخْفِيِّهْ

ثِيْبني واسْتَنْبِطْ اغْرَافا

يا غزير العِرْف ما هِيِّهْ؟!