زَفْنَةْ لُوَامِعْ

جِلْت فِيْ الْخَاطِرْ وْغِرْقَتْ بدَمْعِيْ مِدَامِعْ!!

كِلْ دَمْعِهْ لو بْتَهْمِلْ تغَرِّقْ بَلَدْ..!!

لَيْت مِنِّكْ قِبَضْت الذَّايِرَاتْ الرُّوَامِعْ

كَانْ وَالله عَلَى مَا قِيْل جَابَتْ وَلَدْ

النِّسَايِمْ تِسُوْقِكْ هَمْس وِسْط الْمِسَامِعْ

وَقِّظَتْ كِلّ مَا دَارْ وْسِكَنْ فِيْ الْخَلَدْ

يَوْم ثَارَتْ بَنَادِقْ وِزْفِنَتْ لِكْ لُوَامِعْ

رَبَّعَتْ مِهْجِتِيْ عِقْب الْمَحَلْ وِالصَّلَدْ

بَدِرْ لَيْلَةْ نِصَيْفَةْ شَهَرْ كِلِّكْ مِطَامِعْ!!

مِتّ مِنْ زَوْد مَا اتْمَنَّاكْ لَوْلاَ الْجَلَدْ

رَقّ لِيْ بِالتَّعَاطِفْ كِلّ دَامِعْ وْهَامِعْ

يَوْم وَصَّلْتِنِيْ حَدّ انْقِطَاعْ الْقَلَدْ..!!

أسْألْ الرَّبْ وَاتْضَرَّعْ لِهْ بْكِلْ جَامِعْ

يِجْعَلِكْ لِيْ عِوَضْ عَنْ طَارِفِيْ وِالتَّلَدْ

لو يخَلَّدْ سِوَى الله مِنْ جِمِيْع الْمِجَامِعْ

كَانْ مِنْ زِدّ خَلْق الله حِبِّكْ خَلَدْ..!