نِحْنَا هَل التاريخ واهْل البطولات
في افراحنا بَرْدٍ وْحَرٍ جَلَدْنَا
شَعْبٍ تمَيَّزْ في معانيه بالذَّات
(زايد) زَرَعْها في النفوس وْحصَدْنا
شَعْبٍ تسَلَّحْ من معاني المروَّاتْ
فِيْنَا السَّنَعْ مَوْروث وِبْه انْفَرَدْنَا
فِيْنَا المكارم تشْهَدْ بْطُوْل مَدَّاتْ
مَا تِقْصَرْ المَدَّاتْ مِنَّا بْعَدَدْنَا
خَيْرٍ يعِمّ وْفَاضْ لاقْصى المدارات
وْنِحْنَا سناد اللى يناجي سَنَدْنَا
ومن يَطْلِبْ الْفَزْعه تَرَى تْجِيْه فَزْعَاتْ
بَارْوَاحنا وامْوالنا مَعْ وَلَدْنَا
مبايعين الله ومن ثُمّ هَامَاتْ
عَهْدٍ موَثَّقْ بِالْوَلاءْ وْعقَدْنا
وَعْدٍ تِعَلَّى بالبيارِقْ ورايات
نَقْسِمْ بأنّ الروح فَدْوَى وَعَدْنَا
هذا عَلَمْنَا شامِخ ٍ في السموات
مَعْنَاهْ واضِحْ لِلّذي هو نِشَدْنَا
مَعْنَاهْ مَوْصُوْفٍ بأرْبَعْ عِبَارَاتْ
مَعْنىً ترسَّخ جاري ٍ في جسَدْنَا
بِيْضٍ صنايعنا في كِل المجالات
خِضْر ٍ مَرَابِعْنا وْفِيْهَا سعدْنَا
حُمْرٍ مواضينا صروف ٍ وْشِدَّات
سُوْدٍ وقايعنا وْيَبْرِقْ رَعَدْنَا
ْ
حِبّ الوطَنْ غالي نعيم ومسَرَّاتْ
مصيرنا واحِدْ لحِبِّهْ احْتِشَدْنَا
نفْدَى الوطَنْ بارْوَاحنا في الملمَّاتْ
ما تْهِزِّنا الارْيَاحْ في مِعْتَقَدْنَا
لو صارَتْ الأيَّام فِتْنَةْ نزَاعَاتْ
نبْقَى بْوَلا واخْلاص نوفي عهدْنَا
نبقى شَعِبْ واحِدْ على كل الاوقات
مِتْلاحمين قْلُوْب دايم تجِدْنَا
مِتْمَرِّسِيْن بْصِنْع أرْقَى الحضارات
من سابِقْ التاريخ فِيْهَا اجْتَهَدْنَا
من أرْبِعِيْن وْعَامْ واحْنا شَرَاغَاتْ
قِصَّةْ نجاح ٍ دايمه في رَغَدْنَا
عِمْر الشعوب نْقِيْسها بالنجاحات
واحْنَا سِبَقْنَا من سِبَقْ مِنْ جهْدنا
شَعْب ٍ يحَيِّرْ ما حصَل في الخيالات
ما نقْبَلْ الاحداث تصْنَعْ مَجِدْنَا
المركز الأوَّل حصَدْنَا جِدَاراتْ
ما نقبل الثاني والاوَّل شَهَدْنَا
كِلْنا (خليفه) نِرْفَعْ اليوم شارات
لا ما عَلَيْا من عيون تْحَسِدْنَا
والرَّبْ حافِظْ للقياده وْقُوَّاتْ
كِلْنَا جنود حْدُوْد موْطِنْ مهَدْنا
وْكِلْنَا نحِبّ شْيُوْخنا بْحَقْ واثبات
وِبْهُمْ رقينا وللثَريَّا صَعَدْنَا
فَخْر العروبه شْيُوْخنا والوجاهات
أُسْد الشَّرَى وِبْهُمْ تَرَانا اتَّحَدْنَا
الله عطاهم حِكْمِة ٍ مَعْ كَرَامَاتْ
يا رَبّ تِحْفَظْهُمْ لَنَا يا مدَدْنَا
إبْشِرْ يا (زايد) نَهْجَكْ الذَّرْب مَا مَاتْ
إبْشِرْ حفَظْنَا نَبْعِكْ اللى وَرَدْنَا
عيَالْ (زَايِدْ) والفخَرْ يا (الإمَارَاتْ)
عاش اتِّحَادِك عاش رَيِّسْ بَلَدْنَا