صباح الشَّوْق يا وَجْهٍ تعَوَّدْنَا عَلَى شَوْفه

صباح النور يا بَدْرٍ على طول السنه يظْهَرْ

صباح الوِدّ يا قَلْبٍ به الله ثَبَّتْ حْروفه

صباح الخير يا مِزْنه ترِشّ الكون وِتْعَطِّرْ

توَلَّهْنَا ولو نَكْتِمْ لِكْ الأشْوَاقْ مَذْروفه

ولو حاطَتْ بي اخْوَانٍ بها من طِيْبِتِكْ مَظْهَرْ

ترين البيت لى رَبِّى جَعَلْنا دايم نْطُوْفه

أنا اشوفِكْ مَعِيْ بَيْتٍ إذا ما طِفْته أتْكَدَّرْ

أنا يا مِزْنتي شاعِر عِصَرْه الْوَقْت وِظْروفه

وْمَرَّتْ به سنين عْجَاف لا يَكْتِبْ ولايشْعر

وْطِيْب الْوَقْت خَوَّنْ به وْأشْهَرْ ماضي سْيُوْفه

الين أدْرَكْت ذاك اليوم كيف الظهر يِتْكَسَّرْ

أنا هاجَتْ بي الأيَّامْ وْرَبِّيْ خَذْني بْروفه

وانا يشهد عَلَيِّهْ دَوْم أخافه قَد ما أقْدَرْ

فلا يقْسَى عَلَيِّهْ قَلْب إذا أهْمَلْت مَعْروفه

أنا أهْمَلْت في نفسي وبعض الخيل تِتْعَثَّرْ

أنا ما عاد يغريني جمال الْوَقْت وِوْصوفه

ولو لَوَّنْ لي الأيَّامْ من لون الهنا منْظَرْ

أنا ناسٍ تحاسِبْني على أوْضَاعْ مَخْلوفه

وْرَبِّي كَم عصَيْته كَم وْكَم يَعْفي وْكَم يغْفِرْ

توَلاَّني زمان الهَمّ يصِدّ النَّوْم وِيْعوفه

وراسي شاغِلٍ فِكْري بخَلْق الله يِتْفَكَّرْ

وعينٍ كِل ما تنْظِرْ تشوف عْيُوْن موغوفه

تناظِرْني مِنْ أعْلى الرَّاسْ إلى أقْدامي وِتْشَبِّرْ

تشِلّ أعْلامها السودا وَرَا صِلْبَان مَعْكوفه

وتقرا لي من الألواح في إيماني تْكَفِّرْ

أنا قَلْبي لهم (مَكّه) وهم يدعون لـ(الكوفه)

ودارٍ ما دَخَلْها الشَّر عَلَيْها دَمِّيْ تْهَدَّرْ

أنا كِنْت أعْتِقِدْ قومي سَنَدْ وظْهُوْر مَصْفُوْفه

ويوم تْعَثَّرَتْ حالي عَرَفْت انّ الرجل يقْهَرْ

أنا يا مِزْنتي صارَتْ لي الأوْرَاقْ مَكْشوفه

ولو غَضَّيْت أنا عيني تراني مِدْرِكٍ مِبْصِرْ

أعَرْف اللى يخاويني لحاجة نَفْس مَعْروفه

واقول الْوَقْت لى حَدِّهْ يخَلِّيْني معه أكْبَرْ

أنا أرْخِصْ لكم نَفْسٍ تَرَى من خالجي خوفه

ويعْلَمْ بي أداريكم شرات العين لى تنْظِرْ

أمان الله يا مِزْنه لِكْ الأزْهَارْ مَقْطوفه

من ارْضٍ ما سقاها الناس سقاها رَبِّي وْأمْطَرْ

خِذِيْ ما طاب لِكْ مِنْها وأرْض العِز مَوْصوفه

إذا دِسْتي بها عِزٍ واذا طابت بكم تفْخَرْ