سطوة الحضارة

يا (سويري) لا تذَّكِّرْني بـ(ساره)

ولا تذَكِّرْني بخِلِّيْ يا خِوِيِّهْ

 

ولا تذَكِّرْني يا (بو سالِمْ) بداره

والْيُوَابي والْمُوَارِدْ الاوِّلِيِّهْ

 

وَيْن مُوْرَادْ الْعَرَابِيْ والصداره

وَيْن حَنَّاتْ الْمِفَارِيْد الشِّجِيِّهْ

 

وين (هَزْع الْبَوْش) والْحَزْم وْخَضَاره

وَيْن وِدْيَانٍ بِهَا الغِيْفَان حَيِّهْ

 

تِنْسِقَى من وابِلْ اللَّيْل وْنَهَاره

من هماليل الْمزون الْمُوْسِمِيِّهْ

 

يعل يِسْقى ذلك الوَقْت بْغزاره

من مكَارِمْ والي الدنيا عِطِيِّهْ

 

من يرَجِّعْ لي مِسَا يوم وْنَهَاره

مِنْه.. بَاعْطِيْه الْعِمِرْ كِلِّهْ هِدِيِّهْ

 

آه وا وَيْلاه من سَطْو الحضاره!!

إحْرِمَتْني عِيْشَةْ الْبَرّ الْبِهِيِّهْ