الذَّهَبْ الثَّابِتْ

الوَقْت غَيَّرْ من الدنيا وما فِيْها

إلاَّ الذَّهَبْ ثابِتْ بْطول الزمَنْ لَوْنه

رَغْم الزمَن بَعْض ناس يْظلّ صافيها

مِثْل الذَّهَبْ ما تغيَّر طِيْب مضمونه

لِيْ صِحْبِةٍ من زمَن صِغْري مخاويها

تكاثِرَوْا مثل زَرْعٍ طابَتْ غْصونه

يوم كْثِرَوْا ما كِثَرْ وَقْتي وَاوَفِّيْها

تزيْد الاصحاب والساعات مَرْهونه

فَارَقْتهم غَصْب عَنْ نَفْسي وامَنّيها

في وَصْلهم من يخِفّ الشِّغْل وِشْجونه

والشِّغْل يَغْلِبْ حبال الوَصْل يطويها

والنَّفْس في طَيّها مْن سْنِيْن مَسْجونه

وِيْذِمّني من جَهَلْ نَفْسي وْخَافيها

نَفْسي وانا اعْرَفْ بها بالطِّيْب مَعْجونه

العَيْب عَيْب الحياة بْكِلّ أهَالِيْهَا

نِحِنْ بشَرْ والبشَر عَبْدٍ لقانونه

لَيْت الليالي ذَهَبْ والناس تشريها

كان أفْنِيْ المال يوم الناس يبْكونه

من شان أوَفِّرْ زمَن للنَّاسْ وارْضِيْهَا

لو هو رِضَا الناس غاية حَيّ مَدْفونه