غِنْوَةْ جَرْح

إضْحَكْ بوَجْه المسا يمْكِنْ يغار الصباح

وانَا بَاغَنِّيْ مَعْ الْفَرْقَى وْمَوَّالها

ضَمَّيْت شوق وْجذَبْني بَارِقِكْ يَوْم لاح

وْجِيْتِكْ على فالي وْنَفْسي على فالها

قِمْ واسْقِنِيْ من شَرَابْ الحِبّ عَذْبٍ قَرَاحْ

وِالاَّ اطْو دَلْو الغرام وْقَطِّعْ حْبالها

لا تْقول أخَذْك الزمَنْ مِنّي وما راح راح

بنْعِيْش وِنْموت والدنيا عَلَى حَالها

الوَقْت مَرْكَبْ شِقَا والعمر رِحْلَةْ كفاح

وْكَمْ عاندتنا السنين وما انحنينا لها

شِفْني على شرفة الماضي كسير الجناح!

أكْفَخْ وْذِكْرى الْغَلا ما شَدَّتْ رْحَالها

وْضريبة الحب دَمّ العاشق المستباح

تجِيْه كِلّ المشاكل لَوّ ما جَا لها

لا تْلوم طَيْرٍ على غصن التباريح ناح

ولا تحْسب الدمعه لْيَا طاحت لْحَالها

ما طاحَتْ إلاَّ بَعَدْ ما شافَتْ القَلْب طاح

وِتْسَاقِطَتْ مَعْ طموح النَّفْس وآمالها

أخَذْت دَوْر المحافِظْ في زمَنْ الانفتاح

وِتْعِبْت أداري ظروف الناس واحْوالها

كيف أرمي هْموم صَدْري واشْعِرْ بْالارتياح

وِوْجِيْه الايّام صارَتْ تِشْبَهْ لْيَالها

واخْصامي، الحِبّ والضِّيْق وْعَدُوّ النجاح

وْطَعْنات الاصحاب فال الله ولا فالها

قِمْ رَقِّصْ الليل لين انّه يغار الصباح

وانَا باغَنِّيْ مَعَ جْروحي وْمَوَّالها