جدايل ليل

صِبْحِكْ رِضَا.. وِعْيون شَوْقِكْ.. نواوير

تفْرَحْ بطَلَّة مَبْسَمِكْ يوم ياضي

صِبْحِكْ جواد أبْيَضْ.. زهور وْعصافير

تِفْتَحْ شبابيك الهوا للبياضي

صِبْحِكْ عروس.. ودندنة شدو.. تَقْدِيْر

ورود تَنْسِجْ لي فضا من رياضي

صِبْحِكْ جدايل.. ليلها من أساطير

فَزَّة شَعَرْها له مدى وانتفاضي

نِمْت وْشَعَرْتِكْ تَرْتِجِفْ بِالْحَشَا طَيْر!

وْقِمْت وْشعوري بالهواجيس هاضي

سِكَّرْ مِسَاكْ!!! وْحِمْرَةْ الْوَرْد!!! لِكْ غَيْر

والشَّمْع يعطينا شعور افتراضي

أحتاج وَصْلِكْ مَا انْتِظِرْ مِنْك تَقْصِيْر

وارْضَى بحكم اللى عَلَى الرُّوْح قاضي

تِكْفَى حبيبي نَظْرةٍ مِنْك وِيْصِيْر

كل الذي نبغاه دون إعتراضي

قَلْبي وقلبك تِحْتِضِنْ بَعْض وِنْطِيْر!

نرتاح دام إحساسنا صِدْق راضي

في هالزمَنْ لازِمْ نجي دون تَفْكِيْر!

ولازِمْ نخَلِّيْ هَمّنا فِعْل ماضي

نحْيَا الغرام بْلَحْظِتِهْ وايّ تبرير

ما يِنْذِكِرْ لاهْل القلوب المراضي

أحتاج أدَوِّنْ لِكْ صباحات من خَيْر

وامْلا بحبّك خافِقٍ كان فاضي

نِمْلا جفون عْيوننا بالنواوير

وْنِفْتَحْ شِبَابِيْك الهوا للبياضي