الذَّهَبْ والمركز الأوَّل وساحات البطوله

في سمو المجد تفخر والزمن يوقف تحيَّه

شيخنا (مْحَمَّدْ ابن راشد) مقامه من يطوله

الثريَّا وِدّها بمعانقة نوره وضَيّه

سَيّدي وامطار (لندن) من طِهِرْ كَفِّكْ خجوله

شوفها تتبع مسيرك والمدى روحه وْجَيّه

كل ما قِلْنا (محمَّد) لك هتَفْ شَعْبٍ ودوله

وْغَنَّتْ الدنيا طَرَبْ والكون رَدَّدْ الابجديّه

يا فَخَرْنَا يا ذِخِرْنا لك فَرَحْ قلب الطفوله

ولك هتَفْ كل الْعَرَبْ من (مصر) لين (الأحمديّه)

اسمك الغالي حروفه مَجْد من يقدر ينوله

ورسمك العالي نشوفه ساطِعٍ والشمس حَيّه

يا (محمَّدْ) ما تعجَّل بس خطواتك عجوله

من يفكِّرْ يَدْرِكِكْ خسران وِيْدَيْنه خِليّه

في منصَّات الرياده لك نَعَمْ مليون صوله

وفي ميادين السباق أفعالك العظمى نديِّهْ

تسبق الأيّام والأحْلام بِعْزوم الرجوله

وْفِكْرِتِكْ في كِل حاجه فوق وَصْف العبقريّه

أنْت أوَّل رَجِلْ يمشي العز من جَنْبه وحوله

وانت أوَّل رَجِلْ شَعْبه يعشقه صبْح وعشيّه

وانْت أوَّل رَجِلْ تشهد له على مجده خيوله

وانْت أوَّل رَجِلْ جاوَزْ كل حَد الجاذبيّه

وانْت أوَّل رَجِلْ ينْجِزْ شَيّ قبل إنّه يقوله

وانْت أوَّل رَجِلْ يحْرِثْ في الْبَحَرْ بين البريّه

وانْت أوَّل رَجِلْ تسْبِقْ دَقَّةْ الساعه فعوله

وانْت أوَّل رَجِلْ يِثْبِتْ للبشَر مَعْنى الحميّه

يا (محمَّد) يعشقك هالكون من عرضه لطوله

يا (محمَّد) كل قلوب الوِد لِعْهودك وفيّه

البَحَرْ من فِكْرك النيِّر نثَر درّه ولوله

والمزن من كَفِّكْ الخَيِّرْ همَى للعشب رَيِّهْ

والزمن لو دار تبقى بسمتك أجْمَلْ فصوله

وانْت نسمات الربيع اللى على الخاطِر عِذِيِّهْ

كل غِصْنٍ من غصون الوَرْد لِكْ طاب بْميوله

وكل روضٍ ينحني لك مزهريّه.. مزهريّه

والمطَرْ لحظة حضورك بِكْ نَعَمْ أعْلَنْ هطوله

والعطر من طيب ذِكْرِكْ صِبْحَتْ أنفاسه زكيّه

يا (محمَّد) وانْت أسْمك يشبه (مْحَمَّدْ) رسوله

يحْفَظِكْ رَبّي وتبقى دوم في دنيا هنيّه

راح عيد الفطر لكن عاد بامجادك حلوله

يوم شافك جِيْت تَحْمِلْ للوطَنْ أغْلى هديّه