راعي العوايد

تلبّست دولة (الامارات) لِوْرود

وتوشّحت بالعِز واغْلى القلايد

مبروك للقايد وللريِّس العود

كاس الذَّهَبْ ضَوَّاهْ راعي العوايد

يستاهل الناموس يستاهل وْزَوْد

اللى رفَعْ روس الْعَرَبْ في الشدايد

يا من حَرَثْت البحر والفعل مشهود

أقبل عليك البَر يبغي شهايد

مَعْ خِيْرة الفرسان والنصر معهود

الله يديم العز في دار (زايد)

على ظهور خْيول في سَيْرهن زود

تطوي الدروب الموحشات البعايِدْ

خَطَّطْ وْنَظَّمْ وَحَّدْ الصَّف بِجْهود

متوكِّلٍ بالله وخيلٍ عدايد

كَرَّنْ وغارَنْ كنهن صَفَّةْ جْنود

في ساحةٍ فيها الضغوط اتّزايَدْ

الوضع مِتْأزِّمْ وكل شَي مَشْدود

وْكِلٍ يبى الأوَّل بعَزْم وْجلايد

ما هَزّتك الاوضاع وامطار وِرْعود

قِدْت السفينه لين يِبْت الفرايد

بينك وبين المستحيلات شَ العود

وبين الْعَرَبْ والمستحيلات وايد

سلام مِنَّا عد ما نسنس النود

ويا الله عسى الناموس كل يوم عايد