وَجْه إماراتي

مَا نِيْب لاَ (باولو كويلو) و لا حَد

وَجْهي (إماراتي) حُرُوْفِيْ مِنْ أرْضِيْ

أنَا (أبُوْ الطَّيِّبْ) معَلِّمْني الوِد

(والماجدي) فِيْ بَعْض شِعْري وْبَعْضِيْ

أرْضِيْ ثَرَى (زَايِدْ) وْجَدِّيْ وْ لِيْ جَد

عَاشْ وْنِشَا ثُم مَاتْ رَاضِيْ وْمرْضِيْ

وَانَا عَلَى هَذَا الثَّرَى ثابِتْ الْقَد

مَا ابِيْع لا أرْضِيْ ولا اسُوْم عرْضِيْ

وَجْهي مِنْ الصَّحْرَا مِنْ الحَر والبَرْد

يرْوِيْه سهْد اللَّيْل والشِّعر قَرْضِيْ

وانَا عَلَى دَرْب الموِدِّيْن مَا ارِدّ

مَا ارِدّ عَنْ دَرْب الموَدِّهْ ولا افْضِيْ

مَاضِيْ عَلَى دَرْبٍ عَلَى آخره وَعْد

أجْمَلْ مِنْ الخاطِرْ ولا زِلْت بَامْضِيْ

وَعْدي مِثِلْ ما يَكْتِبْ المِنْتِصِرْ مَجْد

أوْ مِثْل بارِقْ غَيْث والوَمْض وَمْضِيْ

أقْرَا كِتَابْ الشِّعر من سَالِفْ الْعَهْد

أقْرَا (لْمَرْءِ الْقَيْس) والجفن يغْضِيْ

واقْرَا (الْكِنْدي) و(العِقَيْلي) وَانَا ضِد

ضِد التخَلِّفْ والجهل وَجْه رَفْضِيْ

واحْلَمْ ببَاكِرْ مَا بِالاَحْلامْ لِيْ حَد

مَا دِمْت في أرْضِيْ واصَلِّيْه فَرْضِيْ