ذَعَاذِيْع

ما درَيْت أنّ الهوى أمْره صعيب

لين شِفْت المعجزه وِسْط الضباب

شِفْت ضَيّ الفجر لى نوره عجيب

شارِقٍ في نحر تَلْعَاتْ الرِّقاب

كيف أوَصِّفْ هَالْحَلا مَا لِهْ صحيب

لى جماله ثامِنْ السَّبْع العِجَاب

وانا مِنْ وَقَّفْت في جَنْبِهْ صويب

آتِشَاهَدْ لَيْن يِرْجَعْ لي الصواب

لو يشوفه (عنتر) وْ (قَيْس) الأريب

اتْرِكَوْا (عَبْله) وْ (لَيْلَى) للذِّيَابْ!!

ولو يشوفه شايِبٍ حِلّ المشيب

إرْتِجَعْ شَايِبْك لايَّام الشباب!!

وانا ما لي في الهوى حَظ وْنصيب

غير هاضَتْ بي ذَعَاذِيْع الْكِعَابْ

نسمةٍ للنّوْد مَمْزوجه بطِيْب

غَيِّرَتْ مَجْرَى إتِّزَاني والحِسَابْ!!