يقول: نِتْشابَهْ وانا اقول: بِهْ فَرْق
أمّا الضحايا.. كِلّ مِنّا ضحيّه
أنا ضحيّه.. لاخْتلافي فِيَ الطرْق!
وانته ضحيّه.. والمواقف رديّه!
أنا زْرِقوني من سهوم الغَدِرْ زَرْق
وانته مدلَّل في عيون انثويّه
أنا عطوني للسِّحِب تجزي البَرْق
وانته عطيّه.. ما وراها جزيّه!
أنا احْتَرَقْت آجَنِّبْ أخْواني الحَرْق
يوم الخوي بِيْدَيْه يحْرِقْ خويّه
واعْفيت يا (روح القضا) تهْمَة السَّرْق
عَشَانْ تسرقني أيادي خفيّه!
قدَّمْتني قُرْبان لِلْغَرْب يا شَرْق
وارضيتهم.. وَلا رضيته عليّه!!
واسْتَشْهَدْ التاريخ في مِقْلِتي غرْق
يعني ضحيّه في عيون الضحيّه