يا وَرْق يا اللى تسْجَعْ بْصوت يا وَرْق
يكفيك مِنّي سايل الدَّمْع يا اخوك!
وانا خوِيِّكْ وانت لي دَمّ في العِرْق
ما هي قرابة حَظْ لَوْ خَرْدة البُوْك!
هَمّي شمال وْجاوَبْ الهَم في الشَّرْق
خَلّوك يا دَرْب الأحاسيس خَلّوك
واللى لمَعْ في مِقْلِتِكْ لاظي البَرْق
واللى لمَعْ في مِقْلِتِيْ غَزّة الشوك!
كَنّ الحلوم المقبله عِصْبه وْفَرْق
وْكَنّ الوَهَمْ في داخلي عِرْف وِسْلوك
وْكَنّي نجيت وصارت أحْلامي الغِرْق
وْكَنّي ممالك تِيْه ما تَمْلِكْ مْلوك!
فيها من اوّل حِلْم شاعِرْ بَلا طَرْق
وفيها من آخر حِلْم تَفْرِيْق وِشـْكوك
يا ليل يا اللى نْجومك فْـ مِقْلِتِي زرْق
بَابِيْع حَظّي دام حَظِّي له صْكوك!
الكَيّ مِيْسَامه غدا يا جْسِدِيْ حَرْق
يوم الوَهَمْ في داخلي صوت (مَبْروك)
يا اللى سجَعْ صوتكْ وْسَمَّيْتِكْ الوَرْق
دامك خِوِيّ الهَمّ فابْشِرْ وانا اخوك