شمس الْكَرَمْ

الله يبشِّر من لفَى بالبشاره

أمّّ الشيوخ بْخَيْر وِبْتِرْجَعْ (دْبَي)

أمّ الشيوخ اللى قَصِرْها مَنَاره

لو ما تِدِلِّهْ قَصْرَهَا دَلِّكْ الضَّي

ضَي المكارِمْ والنقا والطَّهَاره

لى شَعّ مِنْ (زَعْبِيْل) يَسْفِرْ لِهْ الحَي

الله جَعَلْها نور بَيْت الإمَاره

والله عطاها الرِّشْد تِكْرَمْ عَنْ الْغَي

تعطي ولا تَلْحِقْ عطَاهَا إشَاره

تَكْرِمْ وْتَنْكِرْ كَنَّهَا ما عطَتْ شَي

مَا اخْذَتْ وِسَامْ المشْيَخه بالتجاره

شَيْخه.. سليلة مِشْيَخَةْ مَيِّتْ وْحَي

بِنْت المكارم ما تحَسْب الخساره

شَمْس الْكَرَمْ لكنّها لِلْعَرَبْ فَيّ

اليا طَرَوْا (حَاتِمْ) لفَوْهَا زِيَاره

واليا لِفَوْا الشَّيْخه طَرَوْا (حاتِمْ الطَّي)

أمّ الشيوخ وْ لو نصوغ العِبَاره..

أمّ الفقارى هِيْ.. وأمّ الْكَرَمْ هِي

بِرْجوعها للدار جات البشاره

الله يهَنِّيْهَا وْيِهَنِّيْ بِهَا (دْبَي)