على نهج ( زايد) نهجــنـا والدروب حياد
نعـــزّ الكرام وكلمــة الحق نرفدها
وهـــذا ثــرانا للمكارم .. سـهاد
مهــاد سما باسم دولة زايد الخير وحّــدها
سـقى الله ثـرى زايـد من الطيبـات أرفاد
مثل ماسقى داره ومكّـن عمايدهــا
ومكّـن (خليفـة) لي عليـه الثنــا ينقاد
زعيم البـلاد وظـل هلهـا وقـايـدها
خليفـة ابــن زايـد لــذي بالمـــواقف زاد
عيـونه قـبل يمنـاه للـدار يفــردهــا
ويمنــاه بوخالـد .. محمــد .. دوا الاكباد
ذا ماخَلَـت كبـــد المعــادين يكمـدها
واذا هو تعــزوى باســم أخـوه، اعتزت لبلاد
على ما يبـا صقـر المحافل وسيدها
يـــبانـا ذخر وسـناد .. يـينـا ذخر وســـناد
حقوق الوطن بأرواحنـا له نسددها
لنــا الماضيات أشهـاد والمقبــلات أشــهاد
نفوسٍ على حوض المنايا نورّدهــا
نحن قــــوّة الحـــق وســمانا ســـما الامجـاد
لجل دارنا .. راية ولانـا نجـددها
ولانــا لبـوســــــلطان ما تدركـــــه لأطـــــواد
ولوشـمّرت فوق السحايب سواعدها
نشــمّـــر لهــا بطيــــور تقنـــص ولا تنصـــاد
طَــرَف ذيلها نار وعريضة صوايدها
طيــور الحــديد اللي تكــدّر ســما الحســـاد
تصيـب الهدف من قبل تدرك مراصدها
صقاقيرها جـن و مدى صوتهــا رعّـاد
إذا مرّت براس العـدو مايفنّـدها
تحتهــا جيـوش البــر تزحـف غضب وعناد
تجدّم لها مرّة .. ومرّة تساندها
على خيــل من فولاذ .. تجري بها الاصفاد
تمدّ اللهـب في هامة اللي يهددها
ظهرها بلا سـرج و غذاها جمر وعتــاد
وعليها رجــالٍ طاري الحرب يسعدها
وفرسان بحـر .. إلهم على الطامعين زنــاد
سفنهم بليا شرع تبلغ مقاصدها
«برج خليفة»
ذبيـت راس النايف الشـامخ العـود
صـرحٍ عن صروح البـرايا تـخـلاّ
دونه تـمـرّ السحب ويـمرها طود
وتـمرّ بـه كلّ العيــون وتـملاّ
فـي مصعده كنّـي عن الارض مشدود
والأرض تحتـي مثل بـدرٍ تـجـلاّ
شـرّفت في راسـه ولاحت لي شهود
العاصمـة لاحـت ودار المعـلاّ
من عاصمتنا بوظـبي منبع الـجود
لـين الفجـيرة شعبنا الـحر هـلاّ
قلت أبشـروا شعب الامارات محسود
قالوا صغـار أبراجنا قلت كـلاّ
ماهـمنا لـي يـخلط البيض بالسـود
دامــه تطـاول بالكـلام و تـبـلاّ
باب الكـلام بفعـل الاكـرام موصود
والليـل يـدبـر كلمـا الصبح طلاّ
كن المبانـي كلهـا اطراف عامـود
مافـوق هـذا البـرج بـرجٍ تعـلاّ
هـذا خليفـة لي بـه العز معقود
مكـارمـه منـها المكارم تـحــلاّ
القايـد اللـي مـا لمـدّاتـه حـدود
تـحَـت لـواه بـلادنا تسـتظـلاّ
مايقبـل بداره من الـخلق مضهـود
من حـلّ فـي داره على العز حـلاّ
من زايد الأول تسلسل له جـدود
ميتـين عـام و مـجدهـم ما تولاّ
ومن زايد الثاني ملازيـم و عهود
و آيات عتـقٍ من جبـينه تـهـلاّ
جبينـه اللي دونـه الـمجد مرصود
بعيـون شـعبٍ عـزّ شانه وجَـلاّ
واليـوم راعـي الزود يستاهل الزود
من غرب لشبونه لشرق المكـلاّ
سلام لخـليفة ابن زايـد العـود
أعداد من سـبّح وكـبّر وصـلاّ
وسلام لمـحمد بن راشد الطود
سـلام له واللـي لعهـده تـولاّ