للقاف بفرش من كفوفي مناديل
وابني قصيدة جاتني في وعدها
لعيون ابوراشد وحمدان بالحيل
اشيوخ عزٍ والكرامة مددها
ومني استمع يا سامع الجيل تفصيل
وانظر بروق الساريات ورعدها
واحسب غبار الخيل من مولد الخيل
لين الخيول اللي نبيك صعدها
واتبع مواطئ الخيل ميلٍ ورى ميل
للروم لأرض الاندلس واعتمدها
ثم وجه المنظار وستكشف الليل
شوف النيازك يوم ربك وقدها
إذا تفجر نيزكٍ يشبه اسهيل
وتصادمت شهب السما مع رصدها
تطايرت ذراتها كنها سيل
ما غير رب الكون يحصي مددها
ضفها على ماجا بقولي بتبجيل
وادمج شظاياها ووحد جسدها
يظهر بها رقمٍ يفوق التماثيل
يهز ارم ذات العماد وعمدها
هذا بعض من بعض والموت والويل
للي مواجيبه يحدد عددها
هذاك هو حمدان غيث المخاييل
رمز المراجل والمكارم حصدها
عانق سحاب الجو واصبح هماليل
وكفه كما سيل السحايب هددها
عدى على الجوزاء ونال المحاصيل
اعلى مقامات الكرامه وجدها
وان سار فوق الأرض اصبح ثره سيل
اسقى مواطنها وزين شددها
جلجل بأشعاره وثاروا هل الجيل
جادوا بقيفانٍ وجا سيله ادها
بنا من إبداعه صروح وتماثيل
شيّد معالمها ويغرز وتدها
فتّح بأفكاره بيوتٍ مقافيل
قيفان مدروسه بفكر وفندها
في كل موقع يسلكه به تساهيل
واقسى الصعاب يلين حقه جلدها
حمدان ندعو له من كل تهليل
وابوه قبله كل هويه رفدها
حمدان دمه مجد بعروقه يسيل
للجود معدن والحراره لهدها
اثبت من الاهرام واكرم من النيل
وعدود جوده كل ظامي وردها
لو للمراجل مختبر فيه تحليل
والدم الاسخن بالمراجل وردها
مقياسها يطلع عن الحد ويميل
وتشهد بأنه في المواقف ولدها
ويمسها مست بيوت المداهيل
يرفع عمدها ثم يبني بلدها
في أول اسمه للحراره مناقيل
وصوت القنابل باخر اسمه عقدها
ال حم وال دان اللتقت به حلاحيل
توحدت باسمه وجهده جهدها
والخيل تشهد مع قروم الرجاجيل
ما يسبق اخيوله عدى رسغ يدها
أن جالها حمدان لبت مصاهيل
تعرف اذا جاها لفاها سعدها
وهجنه خذت من حيله المتقد حيل
نقا الاصايل ولسموه مجدها
أن ولع الميدان والكيل بالكيل
بان وتبين في المحافل اسدها
وشيوخنا عز الليال المقابيل
الحاضره والماضية هم سددها
محمد المكتوم يا قصر زعبيل
ننشدك من شيد صروح وعمدها
للناس انجازات ما هو بتقليل
وأمجاد ابو راشد وحدها وحدها
أسس حضارة تضوي الكون قنديل
والغرب عنه ما تخفي حسدها
السيف والقرطاس والخيل والليل
له شاهده.. والبيد تشهد بعدها