أظِنّ لى ضَلِّني ما يغْتِره بَنْدي
لي رايةٍ في شموخ العِزّ مَرْفوعه
لازَمْني الحَظّ واسْتَاصَلْت بِــ (السَّعْدي)
نازَلْت سِعْد السعود وْلان بالطوعه
النايفه يوم رُوْس الغِيْد تِنْعَدِ
والراتعه يوم تِدْلَخْ كِلّ مَرْعوعه
إن غارَتْ الصِّرْف ما ذَلَّيت مِرْتَدِ
أجْبِر كسور (العِلَيْمي) وارْأب صْدوعه
بديت أعِدّ الجدى بالعَزْم مِتْجَدّي
مغزاي لِلّى فشَلْ في العَرْض مَشْروعه
يا (نَبْنِبه) قِدْ وَرَثـْت الشِّعْر عن جَدّي
مِبْطي على ضِفّة الإلهام مَزْروعه
خَذْته من الرُّوْس لا شَحْذه وَلا نَقْدي
يَكَّاتْ ما هي بمَشْرايه وْمَبْيوعه
الشِّعْر مِلْكي وْسِيْد القاطبه عَبْدي
والراي لي دامني في الشِّعْر موسوعه
الشِّعر عَسْجَد وْحِبْري عَنْبَر وْبرْدي
مَرْمَرْ.. وْمِسْك اليَراع تْضَوَّعْ بْفَوْعه
والعِدّ (هَدَّاجْ تَيْمَا) وانْ ذِكِرْ عِدّي
عميق ما يِنْسِبِرْ بالهَيِّنِهْ قُوْعه
والبَزْر لى ما يعَرْف (الشَّلّ) مِ (العَدِ)
أرْيَاهْ ما هي بمقبوله وْمَسْموعه
وِْقصايدي يوم نَبَّنْ ذَبَّنْ النَّجْدِ
والاَّ على مِثـْلِكْ وْشَرْواك مَمْنوعه
مَاْ انْتِه بتِرْزَى أحاجي فِيْك واحْتَدِ
هاك الدّوا لى تعَذَّرْ عَوْقِكْ نْجوعه
(اللاحي) آخر دوا والكَيّه تْسِدِ
تتوب شِعْر النِّسا ما تِيْب مَوْضوعه
لى كَوِّخَوا لِلْحَرار تْلاَكَشْ الرِّبْدِ
ما هو بموسِمْك هَدّ الطير وِطْلوعه
هوب انت لى في شِعِر غِيْد الوطَنْ تسدي
الدار مَحْكومه وْالاقْوال مَتْبوعه
إقْبَضْ رسون الدماثه يا (السَّمَرْقَنْدي)
الطلْقه اللى خِطَتْ الاهْداف مَرْجوعه
ما يَحْسِدْ (طْوَيْق) غير (الرِّجْم) و(النَّدِ)
عِجْزَنْ عن القِمَّه وْتَاجَتْهن ضْلوعه
شِعْر النِّسَا من (عُمَانْ) لْعَارِضْ (النَّجْدِ)
وِمْن (اليمَنْ) لين (بَابِلْ) طايِلٍ بُوْعه
من (بِنْت بِنْ ظاهر) وْ (عوشه) وصَل عِنْدي
وفي عَهْدِيه كَمْ بَرَتْ لي كِلّ مَتْلوعه
يدُوْفِنْ الشِّعْر دَوْف الشَّهْد بالقَنْدِ
ما هي باسامي على الصَّفْحَات مَلْموعه
أمَّا أمثالك (رجال البُوْدَرْ الوَرْدي)
فالرَّجلْ قَبْل الجمال يْجَمِّلْ طْبوعه
ما تْشوفني حرْمه وناموسي مْعَدِّي
أرقى شموخ العلا واخامِسْ صْبوعه
بَرَزْت ما نَوَّفْ بْيِهْ قَدّي وْخَدِّي
ولو شِيْت في ذِمّتي ما هوب مَصْروعه
لكنّي أدرى على والنِّعِمْ واجِدِ
واللاش ماني بحاجَةْ قَطْش يَنْبوعه
أوْرِدْ على مَنْهَل (المَكْتوم) و(الكِنْدي)
أنْهَلْ (فرات الشِّعِرْ) وايَرِّيْ فْروعه
لو شِفْتني يوم وَقْع الخَطْب مِتْحَدِّي
حرْمه ولكن على الشِّيْمَاتْ مَدْفوعه
يدْفَعْني الشان والطوْلات والمَجْدِ
ناموس راسي يطيب بْفَكَّةْ الصَّوْعه
ماني بزينٍِ على الخفرات مِعْتَدِ
لا شَكَ قَبَّاضْ رسْن الحَقّ وِشْروعه
أتاجي بْحَبْل فِكْري لِيْن واشِدِ
ما ابَلِّلْ الموسِده من نادِمْ دْموعه
آزَهِّبْ (البَوّ) قبل آزَايِمْ الفَرْد
ما اخَلّي أمّه تحِنّ الليل مَفْجوعه
ِ
بالحَقّ ماني على الأشعار مِتْعَدِّي
قمراي تَبْلِجْ دجاه وْتطْفي شْموعه
جَمْرَكْت والنِّعْم مَبْذولٍ لَهَا جِهْدِي
طريفها والتلايد مَعي مَوْدوعه
وْسَخَّرْ لي الربّ من رُوْس العَرَبْ جِنْدي
وِمْلايكة خالقي لي حِرْز وِدْروعه
بْفَضْل رَبّي عن التبعات مِسْتَدِ
من ساس بيت التَّرَفْ والأصل مَنْسوعه
بْروحِيه راس ماني تابِعْ لْحَدِ
بْعِز رَبِّي بروس المَجْد مَتْبوعه