الشِّعْر ما هو مجَرَّدْ مَدْح والاَّ ذَم

والاَّ مجَرَّدْ أغاني في حياة الناس ّ

الشِّعْر أسْمَى وأكْبَرْ من كذا واعْظَمْ

الشِّعر صوت العَرَبْ والفِكْر والإحْسَاسْ

إن كان بَحْر الطبيعه له حدود وْيَمّ

فالشِّعْر كِلِّهْ بحور وْمَا لَهَا مِقْياس

من قاعها يخْرِجْ العَذْب الكلام الجَمّ

كأنّه الدُّرّ والياقوت والألْمَاسْ

أصْدَقْ من السِّحْر في قيفانه الطَّلْسَمْ

واقْطَعْ مِنْ السَّيْف في حَدّه فَنَا الانفاس

فيه النقيضين والضِّدَّيْن والمِعْجَم

وِالْحِكْمه اللى بها يِتْمَيَّزْ الرَّمَّاسْ

واسرار تاريخ باحْداث الأمَمْ مفْعَمْ

كَنْز المعارِفْ علوم تْزَيِّنْ الأطْرَاسْ

ماضي وحاضِرْ عَلَى مَرّ الزمَنْ مَنْجَمْ

للشاعر اللى عظيم الفِكْر والهوجاس

اللى يصوغ القوافي دُرّ يِتْكَلَّمْ

كَنِّهْ يصِبّ المشاعِر في عروق ايْبَاسْ

مِنْ رِقّةْ الوَصْف والتصوير لى محْكَمْ

إذا نظَرْها الأصَمْ يسْمَعْ صداها احْسَاسْ

واذا سمَعْها كفيف العين يِتْرَنَّمْ

كَنِّهْ رَأى الشَّمْس تَرْفِلْ في جبين أغْلاس

يا كَمْ قبيله بشاعِرْها غِدَتْ مَعْلَم

وْكَم فارِسٍ زاد به شِعْره شموخ وْبَاس

كَنّ الشِّعِرْ به كمال أهْل المناقِبْ تَمّ

إن كان من صادقْ النيّه وْطَيِّبْ ساس

اللى مَعَ الناس يِتْفَاعَلْ بجود وْحَزم

أمَّا بشَحْذ الْهِمَمْ والاَّ َفرَحْ وَاوْنَاسْ

لانّه لسان العَرَبْ في حَرْب والاَّ سِلْم

فِطْره من الله وأهْدَاهَا لبَعْض الناس

حَتَّى قليل الفَهِمْ بالشِّعْر يِتْفَهَّمْ

كَنِّهْ معَلِّمْ بَلا سَبّوره وْقِرْطَاسْ

واهْل العِشِقْ فِيْه تِتْهَادى وْتِتْنَسَّمْ

عَذْب القوافي تعانِق أعْذَبْ الألعاس

كَنّه حَلاَ الشَّهْد بَعْد المُرّ والعَلْقَمْ

أوْ رَشْفَةْ البِنّ لى تَعْدِلْ مزاج الراس

سَلْوَى المفَارِقْ وْنَجْوَى العاشِقْ المُغْرَم

والشَّعْره الفاصله بين الأمَلْ والياس ْ

هذا هو الشِّعْر والشِّعَّارْ فِيْه أعْلَمْ

مِثْل البَحَرْ.. والبَحَر.. سِرّه مَعَ الغَطَّاسْ