الأمَل المشْرِقْ

لا ما انْسَحَبْت مْن الحياه عِنْدي أَمَل

عِنْدِيْ أمَلْ في الله خَلاَّقْ الحياه

لا انْسَحَبْت مْن الحياه كَلاَّ وْبَل

لي في الحياه طْموح باوْصَلْ مِنْتَهَاهْ

لا ما انْسَحَبْت وْلا نويت آموت لا

ما دام لي مَوْعِدْ مَعْ الصبْح وْبَهَاهْ

ما دام لي عَيْنٍ ترِفّ أهدابها

وْمَا دام لي رَبٍ ويرضيني رضاه

لا ما انْسَحَبْت مْن الحياه عِنْدي أمَلْ

عِنْدِيْ أمَلْ في الله خَلاَّق الحياه

لا ما انْسَحَبْت مْن الحياه وْشَمْسها

تَشـْرِقْ عَلَى الْمِسْكِيْن وِتْدَفِّيْ شتاه

لا ما انْسَحَبْت مْن الحياه دام القمَرْ

يسْهَرْ لاَجِلْ عَيْن المعَنّّى في عَنَاهْ

دام الهوا لِلْنَّاس كِل الناس لا

ما لِلْهوا مَالِكْ سوى الله في علاه

دام العصافير الصغيره طايره

والزَّهر في خَد الثـَّرَى عَاطِرْ شذاه

ما دام غِدْران السما في أرْضِنَا

وما دام لون المزن تهواه الفلاه

لا ما انْسَحَبْت مْن الحياه وْلِيْ عَلَى

الشِّبَّاكْ عصْفورٍ وْيطْرِبْني غِنَاهْ

ما دام خَيْط النور مِنْ بَعْد الدجَى

مَرّ العيون وْقال حَيَّا عَالصَّلاه

وما دام في ثَغْر الطِّفِلْ بَسْمه.. وْعَلَى

خَد الزَّهَرْ قَطْرَهْ.. وْفِيْ الوادي ظِبَاهْ

ما دام في الأرْوَاحْ باقي ساكنين

الحِب والإيمان والله في سماه

لا ما انْسَحَبْت مْن الحياه عِنْدِيْ أمَلْ

عِنْدِيْ أمَلْ لا ما انْسَحَبْت مْن الحياه