شموس

إذا نَسْنِسَتْ مِنْ دار خِلّي جنوبيّه

توَدِّيْ العلوم لْمن تحَرَّى عن اخْبَاري

تلوح البروق وتَمْطِر بْلَيْل وَسْمِيّه

وانا اقول هذي من عطا نعمة الباري

تجي الصوره اللى حَطّها القَلْب خَلْفيّه

أنا اللى حلَمْت وْصار تفسيرها الجاري

إذا عَرّضَتْ من دون موعِدْ وَلا جَيّه

تشَرَّعْ لها بِيْبَانْ صَدْري على الطاري

هي اللى تجي من دون مِقْصَدْ وعَفْويّه

تروِّحْ بقلبٍ في مراويحها ضاري

هي النابغه هي فرحة العمر وَرْدِيّه

هديّة زماني جابها عِنْدي لْداري

عليها المشاعر كِلّها الميّته حَيّه!

وْرَجْفه بصَدْري تبْعِدْ خْطاي واسفاري

تعلّمْت مِنْها ان كِل السهر ليّه

وان الجروح جْروح قَلْبي وتذكاري

تمِرّ الأسامي كِلها مِثـْل ما هِيّه

وْكِلّ الصوَرْ تِِشْبَهْ بعَضْها بمِشْواري

صحيح البشَر أنْفُسْ بصوره مزاجيّه

وصحيح التميِّز له على جدول أفكاري

إذا غابت شْموس الغرام الحقيقيّه

أبَاخِذْ بسَيْف العدل.. وابَاخِذْ بْثاري