دَرْس تجربة

لا تكَدَّرْ واعْتِبِرْ ما فات دَرْس

الفشَل أوَّلْ مفاتيح النجاح

إغْرِسْ بْذور الأمَلْ يا خَيْر غَرْس

واسْقها من طِيْب جِدّانك كفاح

مثل ما ترسي جبال (طْوِيْق) إرْس

لا تملّ وْلا تقول الحَظّ طاح

شِفّ كلام الناس هذا مثل ضِرْس

مَن قلَعْه يْصِيْح.. من خَلاَّهْ صاح

وَقِّفْ بْوَجْه الليالي صَلْب تِرْس

واشْحَن عْزومك ونطّحْها السلاح

وْلا تراخى ثُم يقال الذِّيْب فِرْس

الليالي شيّبت راس الصباح

ولا يخاوي الذِّيْب تكفى (ابن عِرْس)

ثـُمْ قنيبه باكِرْ يْسَمَّى نباح

والقصايد يوم صارَتْ هَرْس مَرْس

فِلّ يا ابداعي لقيفاني جناح

لا ظماني الشِّعْر.. نَادَى كِل طَرْس

اسْقني يا سَيّدي العَذْب القراح

والقوافي تحْتِفِلْ وِتْقِيْم عِرْس

وتكتسي من مَدّةْ مْدادي وِشَاحْ

تجربة عمري بِفِكْر وْقاف شَرْس

الْتِزِمْ بالدِّيْن تبْشِرْ بِالفلاح