أمّي

هنا سِنْتَيْن من عمري أعِيْش وْداخلي مَجْروح

هنا قَلْبي رَحَلْ عَنّي وْكِثـْر الحزن قاسيته

هنا جرحي تَرَكْ دَفْتَرْ مسَجَّلْ به ألَمْ مَفْتوح

هنا قلبي رفَضْ بِعْدِكْ وغصب البِعْد خاويته

دِخِيْلِكْ لَيْه يا يُمَّهْ خَنَقْتي صوتي المَبْحوح

دِخِيْلِكْ كيف هالدنيا تذِلّ الشّخْص في بَيْته!

كبيره صدمة الدنيا تجازيني كثير النوح

يكون آخرها حِرْماني من اغْلى حِبّ حَسَّيْته

فَمَانْ الله يا يُمَّهْ فَمَانْ اللى عطى هالروح

وداعِكْ يصْرَخْ بْروحي وانا بِالقَلْب خَبّيته

يا قَبْر امّي إذا تِسْمَحْ بَاجِيْ لكْ لا بغيت آبوح

بَاجِيْ لِكْ لا نفَذْ صَبْري واحِسّ العمر مَلّيته

بَاجِيْ لِكْ واجْلِسْ قْبَالِكْ واحِطّ ايْدي عَلَى هَاللَّوْح

واحِس ايدي بْيِدَيْن أمّي يا لَيتْه صِدْق يا لَيْته