مهداة إلى صاحب السمو الشيخ خليفة بن زايد آل نهيان رئيس الدولة حفظه الله تعالى ورعاه بمناسبة عيد الاتحاد الــ40 .

يا دَوْلتي دِمْتي بخير وْسَلامه

في ظِل حِكَّامْ الوفا روس الاعلام

قِدْوَةْ هَلْ التوحيد واهْل الكرامه

بين الدول يسعون لِلْمَجْد قِدَّامْ

زعيمهم ساس الوفا والزعامه

حكيم راي ان ضيّعت بَعْض الاحكام

له هامةٍ تِعْلَى عَلَى كِل هامه

الهامه اللّى كِلها خَيْر لِلْهَام

الهام عَدْل وْحَقَّقْ الله مرامه

في حِب شَعْبه ما تضاهيه حِكَّامْ

شَعْبٍ سَعَى لِهْ بالرخا في وئامه

في ظِل (بو سلطان) ما والله يْضَامْ

له من شموخ المجد ذروة سنامه

العادل اللى فِيْه يلجون الايتام

غَنِّي يا (امارات) الوفا باحْترامه

لى قام (بو سلطان) كل الوطن قام

وْنَايِبْ سموّه راس كل الشهامه

تجف ما تحصي مساعيه الاقْلام

كفو الذخيره والسّنَد والحزامه

في مِلْزماته ما تهاوَنْ ولا نام

نحو التقَدّمْ في حياته نظامه

إنْجَازْ عَشْر أعْوَامْ يَسْبِقْ مِيَةْ عَام

وْوَليّ عَهْده في اللوازم حِسَامه

للشَّعْب رِيْف وْلِلْعدو عَوْق واسقام

عَلَيْه مِنْ (زايِدْ) شموخه علامه

مِنْ حِنْكته مَاخِذْ مفاهيم عِلاَّمْ

له هَيْبةٍ تسمو مسامي مقامه

هَيْبة شجَاعٍ شَهْم في الَّلازِمْ يْلاَمْ

سور الوطَنْ وِسْراج داجي ظَلامه

بَامْره رِجَالٍ ما تسَاوَمْ ولا تْسَامْ

دون الوطَنْ ما فِيْه مَجْد وْكَرَامه

ومن لا يوَقِّفْ للوطَنْ فيه ما قام

نِفْداه في عامه وِفيْ غَيْر عامه

هذي (إمارات) الوفَا دار الاكرام

دارٍ عطاها (الشيخ زايد) وسامه

يوم اعتلاها حَقِّقَتْ كِل الاحْلام

بالخير تاريخه على الناس دامه

ما دامت الدنيا برَدّ الثنا دام

في جَنَّةْ الفردوس قَصْره مقامه

عَلَيْه من كِل العباد الترِحَّامْ