وِشْ في غيابِكْ كذا ما يَرْحَم أحبابك!
مجنون طاغي حنون وآه يا اعصابي
كم لي وانا اسأل بوَجْه الأرْض عن بابك!
مَعْقول يعني تبي تِسْتَفْزِعْ غْيابي
تغِيْب واتْعَبْ كثير وأحْضِن ثـْيابك!!
أحِسّ عِطْرِكْ يذوب بْداخِلْ ثـْيابي
أحِسّ كَنّي باموت وأرْجَعْ أحْيَا بك
من كِثـْر ما اشْفق على انّك صِدْق تحيا بي
وِشْ فِيْك؟ جاوِبْ وْقَدِّمْ واضِحْ أسْبابك
وانا باحاوِلْ أوَضِّحْ مُجْمَلْ أسْبَابي
أحْيَاكْ.. أحِبّكْ.. أعِيْشِكْ شوق واغتابك!!
ما بين دَمْع العيون وْعَكْفَةْ أهْدابي
مِثـْل الطفوله أحاوِلْ أدْرِسْ كْتابك
وِدّي لو اعْرِف وش اللى كِنْت تقرا بي
لقيت بَعْض القصيد فْـ ناس تشقى بك
يا كِثـْر ظِلْمِكْ يا كِلّ الناس يا احبابي!!
تحِبّ.. تخْفي.. تلوِّعْني وباسبابك
أحْرَقْت عِشْب القصيد وْزادَت أتعابي
تحِبّ نِجْل العيون وْثورة غْيابك
تكْتِبْ قصايد غَلا وِتْدَمِّرْ أعْصَابي!