الخطوة التائهة

مو كثير اللي لأيّامي جنَيْت

مو قليل اللي من أوهامي خسَرْت

ياما قِلْت انّي من الدنيا قِوَيْت

والحقيقه: ما على القوّه قدَرْت

قِدْ خذيت أشياء لكِنْ ما بغَيْت

لا رِضِيْت وْلا بَعَدْ حَتَّى شكَرْت

في المقابِل ما كسبْت إلاّ لقيت..

شَيّ يخْنِقْ فَرْحَةْ اللي به ظِفرْت

كِلّ دَرْبٍ تايهٍ به قِدْ خطَيْت

لين مِثـَْله صِرْت لكن ما شَعَرْت

تايهه.. ما ادري وش اللي له سرَيْت!!

صامته.. ما لِمْت حَدّ وْلا عذَرْت

يآااه كَمْ قَلْبٍ أنا عَنّه مشَيْت

ما انْجِبَرْت أرْحَل! وْرَبّي ما انْجِبَرْت

بَسّ أحِسّ إنّي إلى البِعْد اهْتديت

مو تكَبِّر.. بَسّ أنا يمْكِنْ كبَرْت!

والدليل؟ أشيا كثير اللي نسيت

وان بغيت أذْكِرْ.. كرهْت اللي ذكَرْت

إيْ كرهْت أذْكِر بكائي لا بكيت

بَس نسيت أنسى أنا كيف انْغِدَرْت!

هذا كل اللي رفضْتِه أوْ رضيت

هذا هُوّ اللي أنا مِنْه انْكِسَرْت

هذا حال العمْر.. يمضي لو أبَيْت

وآنا ما أرْفِضْ ولكِنْ ما صبَرْت

بَسّ أبَابَقَى لا ذكَرْت الله وْدعيت

أرجو إنِّي أبْتِسِمْ لو ما انْتِصَرْت

يا عسى يزهى بياضي لا نويت

يا عَسَاي أفْخَرْ بطِيْبي لا افْتَخَرْت