النَّهر العَذْب

تدري من العام عَنّي يا طموحاتي

لا والله إلاَّ آتباهى فيك واعِدِّكْ

واعَلِّقِكْ فوق حِلْمي واحتمالاتي

وابَرْوِزِكْ في حنايا الجوف وَاشِدِّكْ

لا تكْسِر الْحَوْم في ليل الجفا الشاتي

أخاف مِنّك عليك وْمَاْ ابْغِيْ آضِدِّك

مِدّ الجناحين وِجْنوحك عريضات

خابِرْ عزومك تزيد إصرارك وْجِدّك

ِ

لا يزعجك دَمْع عيني من تِنِهَّاتي

أحْيَانْ تَنْزِلْ دموعك وانت ما وِدّكْ

واللى غيابه مأثـِّر في قراراتي

لو كان لك شَيّ عنده كان ما هَدِّكْ

كَمّ إعْتبرته وْخَوَّنْ في اعْتباراتي

يا لَيْن كَدَّرْ صفاك وْضَيّعه وِدِّك

يا قَلبْي انْت الكبير وْمَعْدِنِكْ ذاتي

لو تلتوي كَنَّها ما تلتوي يَدِّك

والايَّام أوْلَى بجرحي في مداواتي

عن ماضي الأمس يزْعِجْ يومك وْغَدِّك

يا نَهْري العَذْب رَغْم الجَرْح وِشـــْــتاتي

وانته مِثِلْ ما انْت ما توْقَفْ على حَدِّك

بِيْض الْمَعَاذِيْر تغْفِرْ لي خِطِيَّاتي

والخاسِر اللى خسَرْك وْما كسَبْ وِدِّك

أفْضَلْ من البوح عِنْد الحاقِدْ سْكاتي

يحْلَم يِطُوْل السّحاب وْلا اكْتِشَفْ سَدِّك