عيون (قمرة)

فِيهِْنْ سَهَرْ.. فِيْهِنْ وجَعْ.. فِيْهِنْ دْموع

فِيْهِنْ طموح وْأمنيات وْشَهَامه

وْفِيْهِنْ مسَاحَه تجمع العِنْد والطوع

وْفِيْهِنْ طفوله ما تحَمْل الملامه

وفِيْهِنْ رَحَابه تَحْوي صْفوف وِجْموع

وْفِيْهِنْ على بَعْض المواقِفْ صَرَامه

وْفِيْهِنْ سفَرْ ما له على العوده رْجوع

وَلا الزمن حَدَّدْ سنينه وعَامِه

تضْحَك لباكِر تَطْرِد الخوف والروع

وِتْحِبّ تثري جَوّها بابتسامه

إذا صفَتْ إتْخَوِّز الهَمّ والصَّوْع

مِثـْل البَحَر إذا هدَا وانْسِجَامِهْ

عْيون لو تظْما وْيِذْبَحْهِنْ الجوع

تموت لكَنْ ما تِمَسّ الكَرَامَه

واللى عَلَيْه القَلْب مِ الجَوْف مَنْزوع

مَوَدِّتِه تَفْرِضْ عَلَيْ احْترامه

ما هي بِعِشْرَةْ يوم أو عِشْرَةْ اسبوع

وْلا تهاوَنْت بْغَلاه وْمقَامِه

الخَطّ فاصِل أو مشَوَّشْ وْمَقْطوع

صديقنا غَيَّرْ هواه وْكلامه

ما عاد لي طاري وْلا هو بمَسْموع

في صِحْبِتِهْ كَنّه يبَدِّل اْرقَامِه

ضايق قليله.. إلاّ انا حَيْل موجوع

أكْرَهْ على نَفْسي أحِسَ بْندَامه

كانِهْ مدَاه يْحِطّ للهَجْر مَشْروع

يلْزَمْ على قَلْبي يِغَيِّر نظَامِهْ

باقول له رَوِّحْ ولا انته بمَمْنوع

رَوِّحْ معَاهم رَافِقَتْك السَّلامه!!