قَدَرْ وْقِسْمة

ناسيك؟.. لا والله ماني بناسِيْك

وش حالتي عقْبِك؟.. مِثِلْ حالتي دوم

أرْقِبْ غروب الشمس خَلْف الشبابيك

من عِقْب رحلة يوم واسرار وِهْموم

واشوفها تِقْرَبْ وتبغي تناجِيْك

وِتْناظِرِكْ.. لكن غَلَبْ عَيْنها النوم

شِفْ كيف!! حَتَّى الشمس تعْشَق أراضِيْك

كَنْها غفَتْ عندك عِقُب رِحْلة اليوم!!

ذِيْ حالتي عِقْبك عسى الله يجازيك

عَنّي بكِلّ الخير يا غالي السوم

خَلّيتني للضِّيْق وآنا بَاخَلِّيْك

تبقى بقلبي مِثـْل ما كِنْت مرسوم

يبْسَتْ غصون السعْد من عِقْب ساقِيْك

وطَيْر الفَرَحْ ما عاد يقوى على الحوم

ظميان وِرْكابي حظوظٍ مَهَالِيْك

والحِلْم عِدٍ حوله أشجار وِغْيوم

وابْطَتْ ركابي دون عِدّي مبَارِيْك

العِدّ يدعيها وهي عَيَّتْ تْقوم!!

لا تِعْتِذِرْ يوم أبْعَدَتْ بك خطاويك

أدري جبَرْك الوَقْت عن دَرْبي تْشوم

رُوْح وْعَسَى رَبّي يَسَمِّحْ مساعِيْك

لانْها كذا الدنيا مِقَدَّرْ وْمَقْسوم

ألومك لْيَا غِبْت واشْرَهْ واحاتيك

يومك خِوِيِّيْ في الأمَلْ.. لكِنْ اليوم!!

لا انته خوِي ٍ لي ولاني مخاوِيْك

وْلا عاد به شَرْهَه وْلا عاد به لوم!