نواقيس

وَيْنه..؟ ترى صَبْري غدا ليس

وايّامي نْحوس وْثقيله

 

الليل (قَمْره) والأحاسيس

مِتْرَاكمه والكَيْل كَيْله

 

مشاعري غلْق وْمحابيس

وْبِيْدَيْنِهْ يْشِبّ الفتيله!

 

في بِعْدِهْ آدِقّ النواقيس

والعِذْر ما يلقى وسيله

 

شِرْعي بنِسْناسه متاريس

ومرساي في العين الكحيله

 

رموز وارقامٍ معاكيس

والفَضْل لاصحاب الفضيله

 

باكْتِبْ على بِيْض القراطيس

فرايد الشِّعْر الجزيله

 

أقْطَعْ مِنْ طْيور القرانيس

مِتْسَلْسِله وانْدَر فصيله

 

أنا على كل المقاييس

بعيد عن راعي الرذيله

 

واللى مضَيِّقْ صَدْره إبْلِيْس

مَحْروق في قلبه مليله

 

من عادة وْجِيْه المفاليس

كبودهم دايم غليله

 

ما يرتقي شِعْر بْتِبَهْنِيْس

قصير حَبْله من عميله

 

أنا مَعْ النَّجْم المراويس

(قَمْره) على القمّه نزيله

 

واذا دخَلْت بْدورة الرَّيْس

مرَشِّحي عِنْدِهْ دليله

 

سلالة اللى تَنْفِضْ الكيس

شَقْرَا من القِبّ الأصيله

 

نوماس واقبالي تنوميس

أغْلَى من المال وْحصيله

 

تزها بي أنواع الملايس

واوَتِّرْ أعْصَابْ الجميله!

 

لو مَرّ جَنْبي (امرؤ الْقَيْس)

غَنّى وَرا (المَسْحوب) (شَيْله)

 

وعَوَّدْ لي رْكابه مناكيس!!

لو كان ما له فِيّ حِيْله

 

ويا كِثر من حاوَلْ يبى (فَيْس)!!

وْعَوَّدْ بوَنّاتِهْ عليله!!