تعال أبَرْضي مرادك وارضي مْرادي
سؤال صَدِّكْ وْصَدِّي واضِحٍ حَلّه
وِشّو له أسْرَحْ بوَادي وانْت في وَادي
والكل مِنّا عزيز ويكْرَهْ الذلّه
هذا طريق السعاده والله الهادي
ما فِيْه داعي نضيع ودربنا نْدلّه
أدري تبيني أجيك وما تبي تْنَادي!
مِثـْلي وانا اضْحَكْ وْدَمْعي دايم آهِلّه!
المشكله انّي شرابك وانْت لي زادي
بَس البَلا إنّا نعَقْد حْبال مِنْحَلّه
إتْرِكْ كلام التحَدِّي من هو البادي؟
الكل مِنَّا على الثاني يبي الزلّه
توْجِعْني وِتْقول بِعْدِكْ ثـَالِثْ أعْيادي!
واكمام ثوبك من الهِجْران مِبْتَلّه!
نكْذِبْ نكابِرْ نقول إن الوَضِعْ عادي!
أدري وتدري وْكِلٍ مَيِّتْ بْخِلّه
أنا ادري إنّك بدوني تايه وْغَادي
وانا بدونك حزين وْعِلّتي عِلّه
أعْرِفْ بلادك وْمِثـْلي تعْرف بْلادي
ما فِيْه داعي نضيع ودربنا نْدلّه