كل الشعوب تْرِيْد وِتْرِيْد وِتْرِيْد

إلاّ (خليفه) كل ش َعْبه يِرِيْدِهْ

شيخٍ عطاه الله محَبّه وْتَأييد

واغْلاه بامْره في خواطِرْ عِبِيْدِهْ

وَرّثه (زايد) مَجْد لا يمْكِن يْبِيْد

وْزَوّدْ على مَا وِرْث مَجْدٍ من ايْدِهْ

الْمَجْد له ما هو بحاجه لتَمْجِيْد

والعِز له ما زاد عِزِّهْ قصيده

لكن علينا واجِبْ نْقول وِنْشِيْد

باللى علومه عِنْد شَعْبه حميده

الشِّعر ما هو وَصْف في مِتْلَعْ الجِيْد

الشِّعر وَقْفه في المواقف أكِيْدِهْ

بالخِص لى جَا الكَيْد من صاحِبْ الكَيْد

اللى جحوده في كيانه عقيده

اللى يدَوِّرْ في الرّخَا واحَةْ البِيْد

وِيْزِيْد من غلّةْ ثمَرْهَا حصيده

وان جات حَزّاتْ (التِّفَقْ) و(البوارِيْد)

دَوِّرْه.. ما تِلْقَى بقايا شِدِيْدِهْ

تلقاه هو اْلِبْعِيْد يَرْمي لِلِبْعِيْد

وِيْخِيْب في من طاب.. لو كان سِيْدِهْ

لو كان يِتْحَاشَى الشِّبَهْ والْمَنَاقِيْد

ما كان حِقْدِهْ هو وقود الوِقِيْدِهْ

والاَّ الوعل وِشْ تِنْفَعه نَطْحَةْ الْحَيْد

كَسّـرْ قرونه والجبَلْ ما يحِيْدِهْ

يا ليت سِلْسَالْ الشِّعِرْ يستوي قَيْد

وانا عَلَيّ أبْدَعْ سَلاسِلْ لقَيْدِهْ

هذا وْتِبْقَى الدار دار الأجَاوِيْد

فيها قصورٍ للمعالي مِشِيْدِهْ

الله يكْفِيْهَا الحسَد والحواسِيْد

وِيْصونها من كِل شَر وْمكِيْدِهْ

وِيْعِزِّهَا وِيْزِيْدها بالموَارِيْد

وِيْدِيْم عِز شْيوخها اللى نحِيْدِهْ

وِيْدِيْم شَيْخٍ طَلِّتهْ طَلّةْ العِيْد

بِالطِّيْب طولاته قديمه جديده

يشْهَدْ بها الواقِعْ حقيقه وْتَأكِيْد

ما هي دعاياتٍ بصفحة جريده

تاريخ لِلْتّارِيْخ يبداه وِيْعِيْد

اللى بدا (زايد) (خليفه) يِعِيْدِهْ

يوم الدوَل تبني كنوز وْمَرَاصِيْد

(زايد) يِزِيْد بْقَلْب شَعْبه رصِيْدِهْ

ويوم الشعوب تْرِيْد وِتْرِيْد وِتْرِيْد

هذا (خليفه) كِل شَعْبه يِرِيْدِهْ