سيف العدالة

 

 

 

هَلا هَلا وِلْك أعْظَمْ الترحيبي

شبيه (زايد) مرحبا واهْلا به

يا مرحبا ما عَسْعَسْ الغربيبي

وصبحٍ بَلَجْ بالنور نتباهى به

طِيْبي بْقدومه يا ليالي طِيْبي

سَمْح القبال وْمِرْجله وِمْهَابه

بنات فِكْري رَوِّحي بي وْجِيْبِيْ

مكنون دِرٍ هوب كِلٍ يابه

إذا إنقرا ما ينوجِدْ به عَيْبي

فِيْه الِّلآلي الْخِرَّدْ العَجَّابه

سيف الوطَنْ شمسه وابَدْ ما تْغِيْبي

سَيْف العداله وْقَبْضِتِهْ وِنْصَابه

فِيْك الهقاوي شخينا ما تْخِيْبي

سلام لك وِلْروحك الوَثَّابه

عِزّ الشباب وْعَارِضِكْ به شَيْبي

وْمِثْلِكْ تراه النوم ما يهنا به

هموم الامّه شِلْتَهَا يا الذِّيْبي

والحَق بِكْ قِدْ عاد لاجْل أصْحَابه

سافَرْت والدَّعْوى لكم في الغَيْبي

رَبّي تعوده لِلْوطَنْ واحبابه