جداوِل وتداوِل

يا هادِم أحلام البشَر بالمعاوِل

تَفْكِيْرِكْ الضيِّق سبَبْ سطوَة القَهْر

إعطي مساحه.. خَلّ غيرك يحاوِل

واذا خذَلْك الفَجْر لا تلْعَن الظِّهْر

وان كِنْت ما تقْبَل نظام التداول

لا تطفي الأنوار وِتْحارِب الطهْر

جِذْع الشجَر لولا خرير الجداول

ما بَلَّل أغصانه على ضِفّة النَّهْر

وان جاد خَصْمِكْ صِدْق طَرْح التناول

لا تحْجِبْ الموضوع وِتْعَاتِب الدَّهْر

ما لِكْ ومال الصبح يا من تزاوِل

مهنة صديق الليل في حانة العهْر

بانْشِدْك بِعْيونك وِشْ اللى تطاول

غير الوَهَم والدمع والحِزْن والسهْر

خاوي عَقِلْ من زاد جهلك تفاول

قَلْب العمى مِثْل الظما يكسِرْ الظَّهْر

من عَلَّمِكْ قِلّ الحيا والتطاوِل

ليته شَرَح لك قَسْوَة الزَّجْر والنَّهْر

وكانك على صَرْف الليالي مقاوِل

خَلّ القمَر يصبح بَدِر أوَّلْ الشَّهْر!

لو تَحْبِك الخِطّه وتَرْسِم جداوِلْ

حِكْم القِدَرْ مَعْ عالِم السِّرّ والجَهْر

عانِق ضمير الْحَقّ والمَجْد طاوِل

وْمِنْ أجْل عَيْن العِزّ لا تَغْلي المَهْر

وْشَرْوات ما تاخِذْ تعَلَّمْ تِنَاوِل

كِبْر الغرور بْخافقِكْ يصهره صَهْر

شوف النِّخِيْل اللى عِذِقْهَا تطاوَل

كيف انّها تحني على الطَّيْر والزَّهْر