تلويحة رحيل

دخيلك يا الغرام اللى نما في وِسْط قلبي موت

دخيلك تبْتِعِدْ من دون لا ترجع تأذِّيْني

دخيلك تشطِب الماضي ونَبْرَه من بقايا صوت

دخيلك تحْرِقْ الصوره يلى ما فارِقَت عيني

أشوف الدَّمْع في عْيوني وصيحات الرجاوي سْكوت

أشوف آمال تِتْحَطَّم وْسعْد الحَظْ يبكيني

أشوف الحِزْن يهْدِمْني ويبني في حَشَاي بْيوت

دخيلك يا الغرام ابْعِدْ ترى طَبْع الحِزِنْ فيني

أساير دورة الدنيا وْهَمّي في الصَّدِرْ مَكْبوت

وْيكْبَرْ كل ما أكْبَرْ ويسْبِقْ دورة سْنيني

وْتَاخِذْني الليالي وَيْن.. ما ادري والزمان يْفوت

وتاخِذْني بدنيا ما بها إلاّ جْروح تدميني

نسيج الهَمْ لَبَّسْني من احزان الليال بْشوت

دِخِيْلِكْ يا الغرام ارْحَلْ مَعَ تلويحة ايديني

عسى من بَعْدِكْ أشْطِبْ كل ما في داخلي مَنْحوت

دِخِيْلِكْ يا الغرام ابْعِدْ ترى طَبْع الحِزِن فيني