دريت عن اللي حصل لك ويفداك

مهما حصَل من صفحتي ما طويتك

معَزِّتِكْ ما غَيّرَتْها سواياك

رَغْم اعترافك بالخطا ما جفيتك

جيتك أدَوِّرْ بَسْمَة الحب بِشْفاك

تِتِلّنِي لهفات شوقي وجيتك

جيتك أجَدِّدْ ماضي الحب وِيّاك

لا تحسب انّي في غيابك نسيتك

وشلون أوَدِّعْ لَذّة العمر وانساك

ما تدري انّي من غلاك احتويتك

مَعْ كلّ دَقّات الخفوق آتمَنّاك

وفي كل لَذّات الحياة اشتهيتك

يا ما تخيّلْتِك وراجَعْت ذِكْراك

وسَهَرْت مَعْ ذِكْرى غلاك وْبكيتك

تسابَق العَبْرات لا حَلّ طرياك

واحيان أمُرّ بْموتري حول بيتك

لَعَل لا شاهَدْت دارِك وْمرْباك

يَبْرِد حمى الأشواق لو ما لقيتك

هذا الصحيح وْلا اعتقِدْ شَيّ يخفاك

تدري وانا عن كلّ زَلّه حميتك

جاك النصيب اللي كِتِب لك بدنياك

لو قِلْت ليتك جيت قَبْله وليتك

وْصَدّيت أخاف الناس بالقول تقفاك

مْن البدايه بالمعزّه نويتك

وانا الوحيد اللي تحطّم بفرقاك

لأنّك أوّل من عَرَفْت وْهويتك

وحاوَلْت أقَضّي رِحْلتي مَعْ بقاياك

واشْعَلْت شمعات الخيال وْشكيتك

ورسَمْت في صفحات شِعْري محيّاك

أغلب قصيدي في بيوته رويتك

أجْمَل مشاعِر واصْدَقْ إحساس يرعاك

جَنَّبْت غيرك بالغرام وْنصيتك

دايم مجَنِّد كل ما فِيّ لِرْضاك

أخَذْت من زهرة صباي وْعطيتك

الله عن كل المخاليق بَدّاك

بالنفس لو حَظّي يجود اشتريتك

وْلا تعْتِقِدْ سمَعْت هذا ولا ذاك

أنا بديتك بالغلا ما انتهيتك

والله ما احْدٍ مِثْل ما أغْلَيْتِكْ أغْلاك

أمّك وابوك.. ونَسْل حَيِّكْ وْمَيْتِكْ!!