الله يسامِحْك.. وْيسْمَحْ ليلة غْيابك!
يا نور هَذا المكان وْوَحْشَة الغرْفه
غديت مِدْمِنْ صوَرْك وْرِيْحَةْ ثْيَابك!
أضِيْق مِنّي عليك، وْأفْتَحْ الشّرْفه
واتْخَيّلِكْ في زوايا البيت واهابك
واذوق لك في الْحَنَايَا شَيّ ما اعَرْفه
واحِسّ بِدْموع عيني فوق دولابك!!
وآصِدّ أدَوِّرْ لها يا خوي عن صِرْفه
دَمْعي واعَرْفه إذا ما هَلّ باسبابك..
يْدَوِّرْ أدْنَاةْ شَيّ عَشَانْ أقْتَرْفِه!
والليل واشيائك الخَجْلا من أحْبَابك..
من رِحْت تَا اليوم!! ما حَدْ لَدّ لي طَرْفه
وِعْطورك اللى فْضَحَتْني من وَرَا بابك
لا من فتَحْته ذِكَرْت غْيابك وْظَرْفه
وِمْرَايِتِكْ.. لا ظمَاها لون عنّابك
قامَت تصَوِّرْ ملامح وَجْهِكْ التَّرْفه
واثاث غِرْفَتْك في غَيْبَتْك يِهْذَى بك
ما عاد هاوي حِزِنْ يا غَيْر مِحْتَرْفِه
أحْيَان أحِسّ بْوجودك والْعَنْ غْيابك
واحْيَانْ أحِسّ بْغِيَابِكْ والْعَنْ الغرْفه!!