يسعد صباحك مَعْ مساك وْلياليك

الموت بِغْيابك وْشَوْفَتْك عِيْدي

يا احْلى من السِّكَّر على قَلْب مِغْلِيْك

وِدّي أغَذّي من وريدك وريدي

فِدَيْت عمرك كل ما مَرّ طاريك

أحِسّ كَنّي أمْلِكْ الكون بِيْدي

أسْتَشْعِرْ وْجودك بجَنْبي وانَاجِيْك

حتى بْغِيَابِكْ صار حِبّك يزيدي

ما اقول أحِبّك إلاّ انا مَيِّتٍ فِيْك

تدري ما غيرك لى محَلِّي قصيدي!

يا الله عسَاني ما اخَلَى مِنْك وِشْ فِيْك

ما انته على العاده مطَنِّشْ بريدي!!

قِلْ لي وِشْ اللى مِزْعِلِنِّكْ وْيَرْضيك

حتى وَلَو بَتْقول ما هوب بِيْدي

أقَوِّمْ الدنيا عَشَانِكْ والَبِّيْك

ما هَمّني لو عِشْت عمري وحيدي

وان جَتْ على روحي تَرَى ما توفّيْك

يا راس مالي في الحياة وْرصيدي

تدري وِشْ أكْثَرْ شَيّ عِنْدي محَلّيْك

أسلوبك اللى عَ العذارى يزيدي