النور نورٍ لــِ(الإمارات) واقِعْ

وِ(دْبَي) دار الحَي هالشَّي مَخْتوم

الأولى أولى لا وْلا به منازِعْ

يِشْهَدْ لِهْ التاريخ و(الفرْس) و(الروم)

لا قالوا (المَكْتوم) آقول طالِعْ

طالِعْ لحَد السَّيْف وِتْعَرْف (مَكْتوم)

واليوم أنا ماني بنازِلْ وْطَالِعْ

في مدحهم والمَدْح في الوجَهْ مَذْموم

يا تاج راس المَجْد والكِل سامِعْ

ويا نور دِنْيَا وْيا ضِيَا كل هالقوم

وِدِّيْ لو افْرِشْ كِلْ هذي الشوارِعْ

(وَرْدٍ) وْ(ريحانٍ) وْ(جُوْري) وْ(مَشْموم)

والاَّ الشعور أقْسِمْ مِنْ القلب نَابِعْ

في حبّكم أكْتِبْ شِعِرْ غير مَفْهوم

من زود فَرْحي ما أبي من يمَانِعْ

ما ابي عتَبْ من شَخْص لا ما أبِيْ لوم

خَلْني أعَبِّرْ عن مدى حب واسِعْ

في هالعلاقه بين حاكِمْ وْمَحْكوم

نحِبّهم والحِب في القلب سَاطِعْ

نوِدّهم والوِدّ في القَلْب مَرْسوم

اسْم الفَخَرْ (مَكْتوم) في الغَرْب لامِعْ

في الشَّرْق أو في الغَرْب في القَلْب هُمْ دَوْم

والنور نورٍ لــِ(الإمارات) واقِعْ

والنور هذا اليوم مِنْ (آل مَكْتوم)

وْلا قالوا (المَكْتوم) آقول طالِعْ

طالِعْ عيون الناس لا قِيْل (مَكْتوم)