لا خطَيْت وْقِلْت لِكْ خَلِّكْ سموحي
عَدّها يا اخي وْقِلْ ما راح راح!
لا أنا اللى ناجيٍ مَعْ قوم (نوحي)
ولا مأذِّنْكم (بلال ابن رباح)
دايمٍ تخطي واقول انّك مزوحي!!
وانت ما تمزح وْلا تقبل مزاح
ما بقى لي من وَرَاك إلاَّ جروحي!
وما بقى لك من وراي إلاّ رياح!
كل ما هَبَّتْ تِذَكِّرْك بْنزوحي
من سبايِب قِلّة الماي القَرَاح
أرْقِبْ الغيمه وانا جالِس بروحي
كل ما تمْطِرْ على غَرْبي (رماح)!
أذْكِرِكْ مَعْ كل بَرّاقٍ يلوحي
شَعّ نوره فوق دِيْرَةْ (بو فلاح)
واذْكرِكْ لا زِلْت لو ما زِلْت توحي!
كل ما شَمّيت نفحة عِطْر فاح
لو عطورك غير يا مِخْلِفْ طموحي
عن دروب أهْل الطموحات الصحاح