سَيِّد الغَيْم

يا علّني ما اذوق حِزْنِكْ ولا ابْكِيْك

يا عَمّ تَلْعَات الرقاب الطويله

يا اللى تقول لْعَاذلين الهوى (هَيْك)

وْتَفْرِكْ على اليمنى بيسرى ثقيله

وانا اشْهَدْ إنْ ما هي بلِحْيَةْ شبابيك

يا قوم يا الشبَّاك يا عِزِّتي له

لا والله إلاّ اوْصَل وْرَبّي يحَيِّيْك

في مجلسٍ بين الضلوع النحيله

إقْلِطْ تفَضَّل والحفاوَه تباريك

واقْدَعْ فوادي والفضيله فضيله

واشْرَبْ من المَعْلوق بِنٍ يقهويك

لِو انّ دَمِّي من نوادِر فصيله

تدري وش اللى مِتْعِبٍ حال مِغْلِيْك

شَيٍ خَذَا الكَثْرَهْ لعين القليله

لا جيت ساري مِنْك في الدرب ألاقيك!!

وْعَوَّدْت راجع لك وْصِرْت الدليله

يا سَيِّدْ الغيم المنصَّب باسَمِّيْك

مِلْح الحديث المنْتِثِر كلّ ليله

والله لا يخْليني إن قِلْت لَبّيْك

وِدّي نوى وِدّك بأيّة وسيله

وْجَتْك القصايد من طَرَفْها تغَنِّيْك

بَنَات فِكْرٍ تلتحِفْ بالجديله

كَنْها تثنّى من تثنّي معاليك

يا عَمّ تَلْعَات الرقاب الطويله