يا بَارِدْ الإحسَاس صَدْر الغَلا ضَاق
يكفي غيَاب وْيكفي اللّي جرى لي
مسكين قلبٍ دايم الدوم مشتاق
مِسْتَحْمِلٍ ظلْم الزمن والليالي
مثل الجبَلْ ما هَزّتِكْ رِيْح الاشواق
ولا زارِتِكْ ذيك الهموم الثّقالِ!
خسران دامك ما تبي حب وِوْفاق
تذبل زهورك كلما الوَقْت طالِ
أصْعَبْ خَبَر لا قِلْت لي كلمة (فْرَاقْ)
عقب الوفا والحب تنسى وصَالي!
واجْمَل خَبَر لا جيتني حَيْل سَبّاق
تَطْلب حنيني يا بَعَدْ كل غَالي
كَنّ الغَلا مَزْروع في وسْط الاعماق
غايب وْلا يمكن تفارِقْ خَيَالي!
لك في خفوقي حب وازهار واشواق
ولي في خفوقك بس هَجْر وْتَعَالي!
ويا مَالك الإحساس صَدْر الغلا ضاق
يكفي غياب وْيَكْفي اللي جَرَى لي